Centeno pasok sa Last 16
Predator 10-ball tourney
MANILA, Philippines — Ipinasok ni Pinay cue artist Chezka Centeno ang sarili sa Last 16 matapos talunin si Chihiro Kawahara ng Japan, 7-4, sa 2022 Predator World Women’s 10-Ball Championship sa Klagenfurt, Austria.
Ito ang ikatlong sunod na ratsada ng 23-anyos na tubong Zamboanga City matapos blangkuhin si Elise Qui ng the Netherlands, 7-0, at gibain si Chantal Stadler ng Germany, 7-2, sa second round.
Hihintayin ni Centeno ang mananalo sa loser’s qualification para sa silya sa quarterfinals ng torneong may nakalatag na premyong $148,000 (P8.4 milyon).
Nagmula ang four-time Southeast Asian Games gold medalist sa pagrereyna sa nakaraang Asian 9-ball Women’s Championship sa Singapore.
Nauna nang nasibak si 10-time SEA Games gold medal winner Rubilen Amit sa torneong dinomina niya noong 2009 at 2013 na idinaos sa Pilipinas.
Tinumbok naman nina Amit at world champion Carlo Biado ang kanilang ikalawang dikit na panalo sa team event matapos talunin ang Team England, 3-2.
Sunod na haharapin ng Team Philippines ang Team Poland.
- Latest
