Heat at Spoelstra suportado ng mga Pinoy fans laban sa Celtics
MANILA, Philippines — Buhos ang suporta ng mga Pinoy fans para kay Filipino-American head coach Erik Spoelstra na siyang humahawak sa Miami Heat.
Sasalang sa isang ‘rubber match’ ang Heat at ang Boston Celtics sa Game Seven ng Eastern Conference championship series kung saan ang mananalo sa dalawang koponan ang papasok sa NBA Finals.
Ang mananaig sa pagitan ng Miami at Boston ang siyang haharap sa Golden State Warriors na nauna nang umabante sa finals matapos sibakin ang Dallas Mavericks, 4-1, at pagharian ang Western Conference.
Magsisimula ang Game One ng NBA Finals sa Biyernes (Manila time) sa San Francisco.
Kaya naman todo ang pag-cheer ng mga Pinoy fans sa Heat para makapasok ito sa finals.
Kanya-kanyang post sa social media ang mga Pinoy basketball fans dahil isa na namang Pinoy pride ang namamayagpag sa NBA sa katauhan ni Spoelstra.
Tila dala ni Spoelstra ang ‘never-say-die’ attitude ng mga Pinoy sa NBA.
Bago ang Game Six ay nakaabante na ang Boston sa 3-2 sa kanilang best-of-seven series.
Subalit hindi sumuko ang Miami nang resbakan nito ang Boston sa iskor na 111-103 sa Game Six para maipuwersa ang deciding Game Seven.
“There’s no two better words. Game 7. Look, we’re here. This is the way it should be with these two teams. It should have gone seven games,” wika ni Spoelstra.
Handa na si Spoelstra at ang kanyang mga bataan na ibuhos ang lahat upang muling makatuntong sa NBA Finals.
“Bring this thing back on the 29th. There’s nothing like a Game 7. And I’m just really excited that we all get to experience that together,” ani Spoelstra.
Sina Jimmy Butler, Bam Adebayo, Victor Oladipo, Max Strus at P.J. Tucker ang muling babandera para sa Heat.
Pamumunuan naman nina Jayson Tatum, Jaylen Brown, Marcus Smart, Al Horford at Robert Williams ang Celtics.
“We’ve been a resilient group,” sabi ni Boston coach Ime Udoka.
- Latest
