CEBU, Philippines - Gilubong sa Region 7 nga gidala sa University of Cebu (UC) Webmasters ang Region 11 gikan sa Davao, 89-53 sa ilang opener sa men’s basketball event sa 2012 Private Schools Athletic Association (PRISAA) kagahapon didto sa Cebu Coliseum.
Ang reinforcement gikan sa Southwestern University (SWU) Cobras nga si Eleazar Armecin maoy nangulo sa Central Visayas sa iyang 20 puntos, gisundan ni rookie June Marco Mistal nga midiga og 13 puntos.
Sila si Edward Pao sa UC ug Bonifacio Guillena III sa SWU parehong miamot og 11 puntos alang sa ilang unang daog.
Ang hugot nga depensa maoy gihimong hinagiban sa Region 7 diin ilang gilimitahan ang Region II og singko puntos sa first period sa wala pa moposte og 37-19 nga bentaha sa halftime.
Ang Region 7 wala na molingi pa sukad niadto aron moposte og 36 puntos nga kadaugan.
PUNTOS MATAG USA
Region 7 (89) - Armecin 20, Mistal 13, Pao 11, Guillena 11, Cortes 8, Tamsi 8, Tabaloc 7, Quintao 5, Olbedado 4, Ada 2.
Region 11 (53) - Ladao 8, Valdez 8, Javellana 6, Babia 5, Bruno 5, Labios 5, Pelaez 3, R. Rubinos 3, Gasal 3, Villegas 2, Rubinos 1 (BANAT SPORTS)