Bakikaw apan mangligis

Niadtong milabay’ng gabii, nakahigayon ko'g tan-aw sa Azkals batok sa Bangladesh diha sa Studio 23 (replay). Replay nalang gyud ang atong natan-aw kay gidid-an man sa gobiyerno sa Myanmar nga adunay live coverage ang maong duwa.

Didto nako nakit-an kun unsa ka dakung gamit ang Filipino-Spanish nga si Angel Guirado Aldeguer sa atong football team. Ako mong agnihon mga Tirador nga tutoki ninyo si Aldeguer moduwa.

Numero uno akong nakita ang iyang gidak-on, bakikaw man tuod siyang tan-awon kun mo-drive sa bola pero maligsan gyud intawon ang defenders nga Bangladeshi.

Ikaduha mao ang pagka-agresibo niyang mo-atake bisan layo pa siya sa box, bisan tuod masalo sa goalie o mapugngan sa mga defenders nakapakaging gyud to sa mga kontra.

Sa duwa nila sa Bangladeshi Tigers, solidong header ang gihatag ni Aldeguer nga maoy ikaduhang puntos nga nakuha sa Azkals. Una nang naka-iskor og impresibong goal si Ian Araneta sa first half.

Kadtong ikaduhang iskor ni Aldeguer bisan og inanay ra kaayo tan-awon ang bola wala kini mapugngi sa goalie sa Bangladesh.

Maayo hinuon nga adunay napuno nga topscorers sa atong team kay at least dili lang matutok ang atensyon ngadto sa magsuong James ug Phil Younghusband. Of course, sa ato pud nga mga local strikers.

Unta madayon na kining buwenas sa atong football team aron sab kita mailhan dili lang sa Asia kun dili sa tibuok nasud. Si Aldeguer sa akong tan-aw daku og matabang sa team sa umaabot pang mga duwa.

Abi ninyo, ang Myanmar dili pareho nato ka-progresibong nasud tungod sa mga kasamok political ug ang grabeng kahigpit sa ilang gobiyerno ilabi na natong mga langyaw sa ilang nasud.

Apan kun kita mahilig sa basketball, sila football usab ang gikabuangan, aduna sila'y mga world class nga football fields, samtang ang Pilipinas usa ray mipasar sa regional level nga klase sa football field. Ang Panaad Stadium sa Bacolod City.

Siguro dili na kinahanglan pang maghuwat ang atong gobiyerno nga makataak kita sa World Cup aron magtukod og world class football stadium. Kini man gud daku og matabang sa atong mga sumusunod nga football players nga magdala sa atong bandila sa maong sport.

* * *

It’s summer time na. Mga ginikanan awhagon kamo nako nga paapila ang inyong mga anak sa sports karong summer imbes nga mag-atubang sila tibuok adlaw sa mga internet cafés ug uban pang walay ayong kalihukan.

Daghang kapilian nga pwedeng inyong paapilan sa inyong mga anak, adunay martial arts clinics, basketball clinics, soccer clinics, dancesports, ug uban pa. 

Usa sa pwedeng kasudlan ang Yawyan Ardigma atbang sa University of Cebu sa dalan Sanciangko ning dakbayan nga gidumala ni Master Ekin Caniga. Aduna silay Yawyan Ardigma Summer Clinic nga bukas alang sa tanan ilabi na sa kabataan.

Lakip sa summer course nga makat-onan mao ang Yawyan Ardigma System, Yawyan Combat Self Defense, Mixed Martial Arts, boxing, ug labaw sa tanan ang Arnis. Bukas kini sa mga batang nag-edad gikan sa 4-anyos pataas. Sugdan kini ugma hangtod sa   katapusang semana sa bulan sa Mayo.

* * *

Belated happy wedding sa akong fraternity brother nga si Rommel "Wong Fei Hong" Santia.

* * *

PAGTULON-AN: Dili permanente ang kalampusan, mao usab ang kapakyasan.

* * *

[email protected]