CEBU, Philippines - Nag-agi una og diyutay’ng kalisod ang University of San Carlos (USC) Warriors sa wala pa nila hingpit gipadaplin ang University of Southern Philippines-Foundation (USP-F) Panthers aron pagseguro og luna sa top four atol unya sa quarterfinals diin magbaton sila’g twice-to-beat incentive human sa ilang 76-65 nga kadaogan samtang midaog sab ang Southwestern University (SWU) Cobras kinsa mipakgang sa two-game run sa Cebu Institute of Technology-University (CIT-U) pinaagi sa pag-iskor og 81-71 nga kadaogan sa collegiate matches kaniadtong Sabado sa gabii sa nagpadayong 10th Cebu Schools Athletic Foundation, Inc. (CESAFI) didto sa Cebu Coliseum.
Ang Warriors nahimutang na karon sa ikaduhang pwesto ug naghupot og 4-2 nga baraha samtang ang Panthers kinsa mibarug pa hangtod sa kataposang minuto sa fourth period, nag-inusara sa kinaubsan sa ilang 0-5 nga baraha ug padayong nangita sa una nilang daog.
Sama sa naandan, ang eight-man Warriors migamit na sab ug mas balanseng opensa diin lima sa ilang players ang mibahug og double figures ubos sa pagpangulo nilang Sam Hermosa ug Joven Cid Cortes kinsa parehong mihakot og 13 puntos ug laing 11 puntos gikan nilang Michael Cantonao ug Nilton John Otida ug si Robert Gines Codilla kinsa mihagdaw og daghang rebounds, miamot og 10 puntos.
Dili man tuod sama kaanindot ang ilang duwa kung itandi sa ilang nangaging duha ka daog, ang Warriors nabiyaan sa Panthers og tres puntos dihang gipakusgan sa nauwahi ang duwa ginamit ang paspas nga running game, 57-54 may kapin usa ka minuto sa wala pa matapos ang third period apan misikit ang Warriors, 56-57 human sa basket ni Mark Gil Panerio.
Hinoon, dali kaayong nakahimo’g adjustment ang Warriors ug mibawos kini’g 7-0 run pagsugod sa fourth quarter, 63-57 sa wala pa mahunong ni Fritz Dajalos sa USPF sa iskor, 59-63. Gikan niadto, wala na tugoti sa Warriors nga maka-rekober ang Panthers.
Ang kanhi Warrior nga si Dennis Earvin Ferren maoy nangu sa Panthers pinaagi sa iyang 13 puntos ug sila si Mil Anthony Linao ug Lawrence Miguel Marano miamot og 12 puntos matag usa. Wa na gihapon makahuygo sa laing higayon sila si Dajalos ug Ellison Rivera tungod kay igo lang silang nagkumboya og 11 puntos.
Sa laing bahin, si Eleazar Armecin mihulog og unom ka three-point bombs aron pangulohan ang Cobras sa iyang 27 puntos ug si Rene Pacquiao nabalikan sa iyang kadasig ug miabot og 18 puntos alang sa 3-2 Cobras ug mihatag sa Wildcats sa ilang ikatulong pilde sa unom ka duwa alang sa 3-3 nga baraha.
Si Chester Curso maoy nangu sa Wildcats sa iyang 21 puntos ug si Floyd Taboada midugang og 11 puntos.
Sa secondary matches, ang bag-ong dagway nga Cebu Eastern College (CEC) Dragons mikitkit sa CIT Wildkittens, 87-57 aron pabiling maghupot sa liderato sa ilang 5-1 nga baraha samtang ang Sacred Heart School-Ateneo de Cebu Magis Eagles midaug batok sa USP-F Baby Panthers, 78-72.
Puntos matag usa:
First Game:
USC (Srs.) 76— Cortes 13, Hermosa 13, Cantonao 11, Otida 11, Codilla 10, Panerio 8, Santos 6, Uy 4
USP-F (Srs.) 65— E. Ferraren 13, Marano 12, Linao 12, Rivera 6, Tinoy 6, Dajalos 5, Avila 5, Bardilas 2, Sedurifa 2, J. Ferraren 2 Halftime: 38-36
Second Game:
SWU (Srs.) 81— Armecin 27, Pacquiao 18, Maguate 9, Ortuyo 8, Pria 7, Litorja 6, Diango 4, Wagas 2
CIT (Srs.) 71— Curso 21, Taboada 11, Dela Cerna 9, Ipang 9, Booc 8, Dimco 8, Alvarez 2, Cabanero 2, Canete 1 Halftime: 48-36 (BANAT)