CEBU, Philippines - Sa katapusan, nadungog na gyud ang dugay na kaayong gipangandoy ni Jon Eleazar 'Jon-Jon' Adlawan nga modaog sa "Rider of the Year" award atol sa 2009 MS Motosuit Motocross Series awards night sa miaging gabii didto sa panimalay ni MS top honcho Lou Ornopia.
Napunta ngadto ni Adlawan ang labing taas nga dungog dili tungod kay siya ang labing dominanteng rider atol sa 4th MS Motosuit Motocross Series, kun dili sa iyang kinaiya sa matag lumba ug sa pakig-deal sa kauban niyang mga riders ug ingon man sa supporters.
“I thank God for this opportunity and to my family, friends from PSR (PowerSoprts Racing where he belongs) and everyone who supported me.This is a very big accomplishment for me.You need to be the best to be the Rider of the Year so this is really a memorable moment for me,” matud pa sa 19-anyos nga si Adlawan.
Ang unang ROY award sa MS Motosuit Series nakuha ni Irwin Ramas-Uypitching. Ang ikaduhang edisyon nadaog ni Juvanni Abellar, samtang ang ikatulo nakuha ni Siegfred Ornopia sa Kiez BJ Motors niadtong 2008.
Laing misulbong riders nga si John Flores, maoy overall champion sa novice open production, samtang si Dongkey Sanchez naghari sa local enduro, open enduro ug beginners open production categories.
Uban pang mga kampiyon sa lain-laing kategoriya naglakip ni BJ Pepito (pewee), Brylle Ornopia (mini), Dr. Felipe Montejo (executive C), Jun Enriquez (executive B), Siegfred Ornopia (executive A) ug Juvenille Abellar (intermediate).
Si Congressman-elect Benjur Salimbangon sa ikaupat nga distrito sa lalawigan sa Sugbu, MS Motosuit big boss Lou Ornopia ug Daanbantayan councilor-elect Malou Pepito maoy mitunol sa plaque of recognition ngadto sa MS Motosuit top riders sa tuig 2009. Giabagan sila ni Castrol Power One representative Mark Laus. (BANATNEWS)