CEBU, Philippines - Gipakita sa Rain or Shine Elasto Painters nga wala pa sila mahuwasi sa nindot nilang gipakita sa niaging Philippine Cup dihang ilang gilubong ang Barako Bull Energy Buster, 91-83 sa opening game sa Motolite-Philippine Basketball Association Fiesta Cup niadtong kagabii didto sa Araneta Coliseum.
Ang sinaligang sentro sa Painters nga si Jay-R Reyes nikulit og double-double nga 18 puntos uban ang 14 ka rebounds aron pangulohan ang kadaugan..
Ang Elasto Painters, nga niduwa nga wala ang usa sa mga key player niini nga si Sol Mercado kinsa nagsilbe sa iyang one-game suspension tungod sa flagrant foul penalty 2 nga nabuhat niini sa Philippine Cup, nilabaw og 23 puntos sa iskot nga 75-53 padulong ngadto sa final period.
Giguba usab sa Rain or Shine ang adlaw sa bag-ong coach sa Red Bull nga si Leo Isaac. Ang import sa Energy Booster nga si Scooter McFadgon maoy niposte og 41 puntos aron pangulohan ang iyang koponan. - Lemuel P. Maglinte (BANAT NEWS)