Cebu - Andam na ang tanan alang sa Mizuno-Asia Miles Sinulog Half-Marathon karong Enero 17 didto sa Asiatown I.T. Park sa barangay Lahug, ning siyudad.
Kapin sa usa ka libo ka runners gikan sa Sugbu ug sa ubang mga dapit ang magginukdanay sa 21-kilometer run. May lumba sab sa 5K run alang niadtong mga runners nga wala kaayo makapangandam.
Ang kampiyon sa 21K makadawat og P10,000, ang second placer mobulsa og P7,000, ang third placer makaangkon og P5,000.
Ang fourth placer makadawat og P3,000 ug ang fifth placer makaangkon og P2,000.
Ang mopahiluna sa ikaunom hangtod sa ika-10 nga mga dapit makadawat og medalya matag usa.
Adunay special prize ang ihatag ngadto sa record-breakers ning maong lumba nga gipaluyohan sa Philippine Amateur Track and Field Association (PATAFA).
Si defending champion Elmer Bartolo mao ang kasamtangang naghupot sa rekord sa men's division nga mirehistro og usa ka oras ug 10 minutos, samtang si Leizl Lumindas-Getaruelas maoy naghupot sa habig sa babaye nga adunay usa ka oras ug 28 minutos.
Ang top performers sa 5K makadawat sab og ganting salapi diin ang unang lima ka finishers makadawat og P3,000, P2,000, P1,500, P1,000 ug P500. Makadawat sab sila og commemorative medal matag usa.
Si Jesse Taborada, ang presidente sa organizing Cebu Executive Runners Club (CERC) mipasalig nga mas nindot ang lumba ning higayona itandi sa miaging tuig.
Niadtong buot mosalmot sa lumba mahimo pang makaparehistro hangtod sa Enero 14.
Ang registration centers naglakip sa Mizuno sa SM City-North Wing, Philippine Sports Commissioner (PSC)-7 nga nahimutang sa Cebu City Sports Center, Holiday Gym & Spa ug ang Sug-angan Restaurant sa J. Llorente street. – BANAT NEWS