CEBU - Manalipod na si Nonito 'Filipino Flash' Donaire sa iyang International Boxing Federation/ International Boxing Organization (IBF/IBO) flyweight title batok ni South African challenger Moruti Mthalane sa undercard sa "The Final Impact" karong adlawa didto sa Mandalay Bay Resort and Casino sa Las Vegas, Nevada.
Yano rang nakuha ni IBF/IBO flyweight king nga si Donaire (19-1, 12 KOs) ug sa challenger niining si Mthalane (22-1, 15 KOs) ang timbang atol sa weigh-in kagahapon didto sa J-Pop lounge sa Mandalay Bay.
Ang 25-anyos nga si Donaire, kinsa nagsul-ot sa iyang Arthro Kontra Arthritis jacket sa wala pa motongtong sa timbangan, mitimbang og 112 pounds, samtang si Mthalane ubos lang og usa nga mitimbang og 111 pounds.
Makita sab ang mga dagway sa duha boksidor nga andam na kini sa maong binukbukay.
“This time, I am not really having a very hard time making weight. I had enough time to do it,” matud pa ni Donaire sa wala ang official weigh-in nga gitambongan ni promoter Bob Arum ug ni Lupe Contreras.
Nagkanayon ang trainer ug amahan ni Donaire nga si Nonito Sr., nga dili angay’ng kompiyansaan si Mthalane, apan daku ang iyang pagsalig nga molampos ang iyang anak karon sa pagdepensa sa iyang bakus.
Mao kini ang ikaduhang title defense ni Donaire, una batok sa Mehikanong si Luis Maldonado nga iyang gipakamang sa eight round niadtong Disyembre 2 sa miaging tuig.
Magsangka alang sa main event mao sila si Julio Cesar Chavez Jr. (36-0, 29 KOs) batok ni Matt Vanda (39-7, 22 KOs).
Si World Boxing Association (WBA) interim superflyweight titlist Jorge Arce (50-4-1, 38 KOs) modepensa usab sa iyang bakus batok ni Isidro Garcia (25-8, 15 KOs). – BANAT NEWS