Mo-abot ngadto sa P100,000 nga ganting salapi ang iapud-apud sa mga mananaog sa 1st Mayor Lionel E. Bacaltos Cup Basketball Tournament nga gikatakdang mosikad karong Sabado didto sa Bonifacio R. Bacaltos Sports Centrum sa lungsod sa Sibonga.
Mobanat sa labing daku nga torneyo sa basketbol sa kasaysayan sa Sibonga mao ang nag-unang mga collegiate teams sa Sugbu nga gipangulohan sa seven-time CESAFI champion University of the Visayas (UV) Green Lancers ug reigning National Students Basketball Championships titlist Southwestern University (SWU) Cobras.
Ang University of San Jose-Recoletos (USJ-R) Jaguars, ang labing unang kampiyon sa VAAA ug mao sab ang nanghawod sa 1st M. Lhuillier Kwarta Padala Summer Basketball Challenge sa miaging semana diha sa Cebu Coliseum usa sab sa mga lig-ong kontender nga mosakmit sa korona.
Lain pang mga koponan nga mokumbati sa usa ka bulan nga torneyo mao ang Salazar Colleges of Science and Institute of Technology (SCSIT) Skyblazers, Asian College of Technology (ACT) Cyber Knights ug Don Bosco College (DBC) Greywolves.
"We want to give the people of Sibonga a new class of basketball entertainment," matud pa ni Sibonga Mayor Lionel E. Bacaltos atol sa press conference sa miaging adlaw didto sa Hotel Fortuna nga gitambongan sab ni sports patron ug league organizer Lorenzo 'Chao' Sy ug pipila ka mga local ug barangay officials sa Sibonga.
Si commissioner Jose 'Boy' Murillo nagkanayon nga ang torneyo magsubay og single round robin format sa eliminasyon. Ang nag-unang duha ka teams maoy magsangka sa kampiyonato sa usa ka "best-of-three" series, samtang ang ikatulo ug ikaupat nga teams maoy mag-abot alang sa ikatulong puwesto.
Ang makampiyon mobitbit og P50,000, samtang ang first runner-up modawat og P25,000. Ang third ug fourth mobulsa og P15,000 ug P10,000.
Si Bacaltos mibutyag nga gawas sa basketbol, mopahigayon sab sila og kompetisyon sa amateur boxing ug softball.
Ang serye sa maong kalihukan sa paugnat sa kusog gipahigayon aron pagdugang sa kasadya sa tinuig nga kapistahan sa Sibonga karong Agosto 9-10, kansang ilang mga mahal nga patron mao ang Nuestra Señora del Pilar ug Sta. Filomena.