Nabulilyaso noong nakaraan, muling tatangkain ng Hapee Toothpaste na makuha ang finals berth sa PBL Lipovitan Amino Sports Cup sa kanilang pakikipagtipan sa Burger King sa Game 4 ng kanilang best-of-five semifinals series.
Magtatagpo ang Complete Protectors at Whoppers sa natatanging laban sa Gov. Ayong Maliksi gym sa Trece Martires, Cavite sa ganap na alas-2:00 ng hapon, kung saan ang Hapee team ay umaasam na makuha ang panalong nabigo nilang kunin noong Game 3.
Ang Game 4 ng kanilang serye ay ipapalabas sa Basketball TV Channel 34 at IBC 13 (7-9 p.m.) sa pamamagitan ng delayed basis.
Ang kabiguan ay naglapit sa Burger King sa serye sa 2-1. At kung kailangan ng Game 5, ito ay gaganapin sa Lunes.
Nauna nang umakyat sa finals ang Harbour Centre sa pamamagitan ng 73-69 panalo laban sa San Mig Coffee noong Huwebes via 3-0 sweep. (MBalbuena)