Si ALA Boxing Gym top honcho Antonio 'Bidoy' L. Aldeguer mipadayag sa Banat News pinaagi sa text message nga sila si Bautista gikatakda nga motugpa karong alas 9:00 sa buntag didto sa San Juan Airport diin sila tagboon ni Golden Boy Promotions vice president Eric Gomez.
Ugma, sila si Bautista ug Banal magbansay-bansay gilayon kauban si de la Hoya didto sa maanindot nga Wilfredo Gomez Gym sa San Juan.
Si Villamor maoy mangunay og ensayo nilang Bautista ug Banal, apan segurado nga hatagan sila og pointers kun mahinungdanong mga stratehiya ni Roach.
Sila si Bautista ug Banal nagpanikad na sa labing dakung break sa tagsa-tagsa nila ka career gumikan kay mopakita man sila sa ilang abilidad sa undercard sa gikahinamang super-fight ni De la Hoya batok ni pound-for-pound king Floyd Mayweather karong Mayo 5 didto sa MGM Grand sa Las Vegas, Nevada.
Si Bautista (22-0, 17KOs) makigharong batok sa wala pa say pilde nga si Sergio Manuel Medina (28-0, 16KOs) sa Argentina sa usa ka opisyal nga WBO super bantamweight eliminator, samtang si Banal (12-0-1, 10KOs) moaway sa labing unang higayon sa Amerika sa wala pa mailhing kontra.
Ang modaog tali sa engkuwentro nilang Bautista ug Medina maoy mamahimong mandatory challenger ni WBO super bantamweight champion Daniel Ponce de Leon sa Mexico, nga bag-o pang nakadepensa sa iyang korona human pildiha ang beteranong Pinoy nga si Gerry Peñalosa pinaagi sa kontrobersiya nga "unanimous decision" dili pa dugay.
Si Aldeguer nagkanayon nga sila si Bautista ug Banal mobalik sa Amerika karong Abril 29 o usa ka semana sa dili pa sagubangon ang labing mahinungdanong away sa ilang kinabuhi.