4 teams unahan sa Game 1
MANILA, Philippines — Mag-uunahan sa 1-0 lead ang No. 1 Marinerong Pilipino-San Beda, No. 2 at nagdedepensang EcoOil--La Salle, No. 3 University of Perpetual Help System Dalta at No. 4 Wangs Basketball-Letran sa semifinals series ng 2023 PBA D-League Aspirants’ Cup.
Magtutuos ang NCAA rivals na Red Lions at Knights ngayong alas-2 ng hapon kasunod ang banatan ng Green Archers at Altas sa alas-4 sa Game One ng kani-kanilang semis showdown sa Ynares Arena sa Pasig City.
Awtomatikong umabante sa semis ang Marinero-San Beda at EcoOil-La Salle habang dumaan sa quarterfinals ang Perpetual at Wangs-Letran.
Sinibak ng Knights ang Centro Escolar University Scorpions via overtime, 94-87 habang pinatalsik ng Altas ang PSP Gymers, 97-90.
Inaabangan ang salpukan ng Marinero-San Beda at Wangs-Letran na matinding magkaaway sa NCAA.
“Hindi kami puwedeng mag-relax kasi dito sa PBA D-League playoffs, tumataas ang laro so dapat makasabay kami doon,” ani Red Lions’ coach Yuri Escueta sa Knights. “We expect the games to be tougher. There’s no room to relax.”
Tinalo na ng Marinero-San Beda ang Wangs-Letran, 90-87, tampok ang game-winning three-point shot ni Yukien Andrada.
“We’re very excited kasi San Beda makakalaban namin,” ani Knights’ mentor Rensy Bajar. “We need to stick with our defense na nagbibigay sa amin ng buhay at siyang kultura namin dito sa Letran.”
- Latest
