Humok og Ilong

Dear Tito Miguel ,

Ako diay si Jericka. Ang akong problema mao ang akong pagkahumok og ilong, o  dali rako madala sa flowery words sa mga lalaki. Ang ending, biyaan ra diay ko . Wala man gyud ko matagam Tito Miguel uy, if naay modiskarte nako , madala dayon ko ,grabe ka marupok. Unsa akong buhaton ? —Jericka

Jericka,

Buot pasabot kuwangan ka sa pagtagad. Gamay nga atensyon ihatag kanimo, imo dayon padak-on. Ayaw basola imong kaugalingon, posible naa nay hugot kaniadto pa, basin tungod sa palibot samtang nagdako ka, giunsa ka’g tratar sa imong pamilya o mga higala. Apan kay dalaga na man ka, puede na ka magkat-on unsaon pag kontrol sa imong kaugalingon. Ayaw’g salig sa pulong. Wala kini pulos kun dili makita sa buhat. Kun dunay magparamdam kanimo, pakipot ug palugit. Aron imo masukod unsa siya kaseryoso kanimo. Kay kun mahanaw lang dayon usa lang ka balibad, buot pasabot gisuwayan ra ka, dili ka tinuod nga hinigugma.

Ang tawo nga kanimo seryoso maninguha’g maayo, maski kapila pa nimo balibaran. Kun mobalik gihapon maski imo sultihan nga dili pa ka andam o tan-awon lang, mas motaas ang panahon nga ikaw kiligon. Sa maong paagi duha imong pabor, gitikon ka ug masuwayan nimo kun siya sinsero. Natagbaw pa imong humok nga ilong, masusi pa nimo kun siya seryoso kanimo. Pero lagmit mahadlok ka nga dili na mobalik kun imo balibaran, anugon labi na’g ganahan sad ka, busa imo na lang sugton dayon. Diha ka nahimong baratohon. Kay sayon ra man ka kuhaon, sayon ra sad ka biyaan ug talikdan. Posible gani giduwa-duwaan ra ka nila. Lagmit kaila sila, ang niagi nimo nihagit sa lain nga suwayan ka, kay humok ra. Basin gani nagpustaanay sila. Wala ka nila giilogan, kun dili giyaga-yagaan.  —Tito Miguel

Magpatambag ka? Ipada kang Tito Miguel: 0998-581-5856