Eala at Spoelstra nagkita sa laro ng Miami Heat
MANILA, Philippines — Nakadaupang palad ni Filipina tennis star Alex Eala si Filipino-American NBA head coach Erik Spoelstra sa laro ng Miami Heat kontra sa New York Knicks kahapon sa Miami-Dade Arena.
Nagsilbing lucky charm si Eala matapos mag-apoy sa 127-120 panalo ang Heat kontra sa bisitang Knicks upang umangat sa No. 7 spot ng Eastern Conference hawak ang 40-34 kartada.
Pagkatapos ng laban ay bahagyang nagkausap ang dalawang Filipino pride tampok din ang star center ng Heat na si Bam Adebadyo na inaasahang lalaro sa Team USA sa 2023 FIBA World Cup na gaganapin sa Pilipinas.
Katatapos lang ng kampanya ni Eala sa Miami Open tampok ang 6-2, 7-5 kabiguan kontra kay Irina-Camelia Begu ng Romania sa Hard Rock Stadium kamakalawa kaya dumaan siya sa kalapit na Miami-Dade Arena upang suportahan ang kababayang si Spoelstra.
Mainit na sinalubong ni Spoelstra si Eala at hinikiyat na magpatuloy lang sa pangarap sa international scene para sa karangalan ng Pilipinas.
Nangako rin si Spoelstra na manonood nang personal at susuporta sa Filipina tennis sensation sa kanyang pagbabalik sa Miami Open sa susunod na taon.
May hawak na dalawang NBA titles si Spoelstra para sa Heat at isa sa NBA 15 Greatest Players, habang kapapanalo lang ni Eala sa US Open juniors championship noong nakaraang taon upang maging kauna-unahang Pinay Grand Slam champion.
Naghahanda si Eala, wagi ng dalawang juniors doubles titles sa Australian Open at French Open, para sa French Open women’s championships sa Mayo.
- Latest