EDITORYAL — Libudsuroy patamnon?

Nagplano si Cebu City Mayor Nestor Archival nga tudloan og panguma sa bukid ang mga libud-suroy sa kadalanan aron daw sila makat-on og panginabuhian ug sa samang higayon makatabang sila para sa food security sa siyudad.

Kaning plano sa mayor maayo kaayo og tumong. Tulo gyud ka mga problema ang masulbad ani kung matinuod. Pero, ang labing sigurado ani , ang siyudad maningkamot gyud nga kini mapatuman.

Ang kalamposan ani naa ra gihapon sa mga libud-suroy nga gustong tabangan sa siyudad. Makapila naman ka higayon nga dunay gipanghipos nga mga libud-suroy sa nangaging mga administrasyon ilabi na kun magkaduol na ang Pasko ug Sinulog.

Naa pay Balik-Probinsya Program, gipahugtan ang Anti-Mendicancy Ordinance nga diin gidili na ang pagpangayo og limos diha sa kadalanan.

Kaning mga libud-suroy sa Cebu City, tulo ka klase. Naay mga makililimos, naay diha na gyud nagpuyo sa dalan diin sila mohigda panahon sa gabii, diha nalang sab gani ang uban mangaligo ug magluto sa ilang pagkaon kay ang ilang panginabuhi naa man sad sa karsada sama sa papamunit og basura, pangarga, ug bisan unsa lang nga trabaho aron mokita.

Ang ikatulo kanang mga dunay mga deperensiya sa pangisip nga lago kaayo, ang uban wala na gyuy sapot. Samtang kadaghanan ani nila dili bayolente, apan duna gyuy pipila nga kuyaw kaayo para sa publiko tungod sa pagsuol-suol o sukmat sa ilang sakit sa pangisip.

Asa man aning tulo ang buot tabangan sa mayor? Dili man tingali puydeng dili sab tabangan ang tanan.

Pero ang pangutana ani, kung ingon ana lang ba kadali para aning mga libudsuroy nga usbon ang ilang naandan? Kay kani sila naanad ra ba sa kinabuhi sa karsada, pwerteng layoa sa gusto sa mayor nga ilang pagabuhaton.

Kun tinud-on gyud ni nga programa, kinahanglang gahinan ni og dakong pundo ug panahon. Labaw sa tanan, pailob tungod kay dili sayun ang pagpanguma ug pagpamuhi og kahayopan, basin mapul-an lang unya ang mga benepisaryo o ba kaha dili padayunon sa mosunod nga administrasyon ang programa, mamalik na sab sila sa kadalanan.