Utang napod

Giaprobahan sa World Bank ang giutang sa gobIyerno sa Pilipinas nga nagkantidad og $800 milyones.

Ang giutang para kuno isuporta sa reporma nga gitumong sa pag-agni og pribadong puhonan ug pagpaligon sa fiscal resilience ug pagpataas sa kahanas sa ilang trabaho sa mga momomoo.

Ang giutang nga gitawag sa gobiyerno og Philippines Growth and Job Development Policy Loan motabang sa pagpalambo sa fiscal management, business environment ug workforce development aron makamugna og daghan nga trabaho.

Sa kataposan niadtong buwan sa Enero ning tuiga ang utang sa gobyerno miabot na sa pinakataas nga P18.13 trilyones o $307.9 bilyones matud pa sa nasudnong panudlanan.

Nagrepresentar kini sa 2.41 porsiyento nga pagtubo gikan sa buwan sa Disyembre tuig 2025 ug pagtaas nga 11.16 porsiyento gikan sa P16.31 trilyones nga utang sa Enero tuig 2025.

Sa buwan sa Enero ning tuiga ang gobyerno sa Pilipinas adunay utang nga P12.32 trilyones sa mga financial institution dinhi sa nasud. 68 porsiyento sa kinatibokang utang.

Samtang ang utang niini sa gawas nasud anaa na sa P5.81 trilyones o 32 porsiyento sa  kinatibokang P18.13 trilyones.

Bisan pa man niini gipaneguro sa nasudnong panudlanan nga sulod ra gihapon sa 2026 borrowing program nga P19.6 trilyones.

Utang napod. Ang gobyerno walay kalainan sa atong mga ginikanan nga kun maapikihan walay kapaingnan gawas sa pagpangotang.

Ang utang makatabang kun idapat sa rason nga kini giutang.

Ang problema kun ang giutang sa atong gobyerno nga mikantidad og $800 milyones masulod ngadto sa maleta ug i-apod-apod ngadto sa tumotukob nga buaya.