Atubangan sa Santisimo

Sa akong pagtagik ning maong lindog literal akong nag-atubang sa konsagradong hostiyas sa altar sa may minteryo.

Kini tungod kay adlaw man sa mga nangamatay ug kay wala may nagpundo sa opisina sa parokya sanglit kaming tanan anaa man sa bugtong sam-ang sa parokya nga nahimutang sa may Kalag-itan, Buanoy, Balamban, Cebu.

Gipahimuslan nako ang kahilom sa pakig-uban sa Ginoo diha sa altar diin pagasaulogon ang Santos nga Misa.

Sa akong paghilom akong naamgohan kining mosunod:

1. Bugtong ang Ginoo ang seguro diha sa kamatayon sanglit siya man ang kinabuhing dayon.

2. Sa kinabuhi usahay makita ang imong bili kun wala ka na.

3. Ang mga pagmahal ug paghigugma ipakita usahay diha sa mga bulak nga hinalad sa lubnganan apan niadtong buhi kia pa ikaw nahikalimtan.

4. Anaa ang kagahob sa mga sam-ang apan human sa kasaulogan mamahimong mingaw na usab ang tanan.

5. Sa minteryo walay marites apan dili ikalimod nga usahay ang mga patay na libakon gihapon sa mga buhi.

6. Ang mga pagkaon nagpasad sa lubnganan apan tingali mahimong mapuslan kini kun ipaambit sa mga silingan.

Balik sa Santisimo. Ako nihunghong sa Ginoo nga kun ako naman ganing turno mamatay unta ako hatagan sa grasya nga makapangandam aron sa Dios makig-atubang.