Karong adlawa atong saulogon ang atong ika-127 ka tuig nga Adlaw sa Kaugalingnan.
Adlaw nga angay dimdimon sa mga Pilipino ang bunga sa mga sakripisyo sa atong mga bayani kaniadto.
Mga bayaning niula sa ilang dugo, singot, panahon ug kinabuhi aron maangkon nato ang atong kaugalingnan.
Si Dr. Jose Rizal, ang nasudnong bayani sa nasud namulong nga ang kabataan ang paglaum sa nasud.
Nakita niya kini sa iyang panahon, nakita niyang buhi ang kainit sa kasingkasing sa mga kabataang Filipino nga maangkon ang kagawasan ug modala sa timon sa nasud.
Kay sa iyang panahon, ang mga katiguwangan o henerasyon sa ilang ginikanan nagapos na sa impluwensiya sa mga mananakop nga Espanyol ug nahadlok ng mosupaksupak.
Kung dili man nagapos, gikalimtan na nila nga sila mga Pilipino tungod kay nahubog sila sa gahum nga gihatag kanila sa naglingkod nga gobiyerno sa mga Katsila.
Karong bag-ong henerasyon, sa kabataan nalang nato ihangad ang kaugmaon sa Pilipinas.
Kay karon palang, makita naman nga ang mga katiguwangan wala nay kalainan sa mga ginikanan sa panahon sa atong mga bayani.
Nagapos o nahiktan na sila sa mga politiko gamit ang mga tam-is nga labtik sa ilang mga dila, mga ayuda, mga bakak, mga pasalig ug uban pa nga para lang sa ilang interes ug dili para sa kaayohan sa nasud ug sa mga Pilipino.
Gikinahanglan sa Pilipinas karon ang kabataan nga motingog, mobotar para niya ug mobarug para sa mas hustong direksyon nga ang mabulahan mao ang katawhang Pilipino ug dili ang pipila lamang nga gustong gawngan ang tanan.