Gi-aprobahan na sa Kongreso ang balaodnon (HB No. 11287) nga maglugway sa termino sa mga barangay ug Sangguniang Kabataan officials gikan sa tulo ngadto sa unom ka tuig ingon man nag-uswag sa eleksyon ngadto sa Mayo 2029 inay karon unta’ng Desiyembre 2025 aron kuno mahatagan og igo’ng panahon ang mga barangay ug SK officilas nga mapatuman sa hingpit ang ilang mga plano ug programa. Dili kaayo pulido ang rason sa pag-umol sa maong balaodnon. Matud pa sa mga observers, “Tataw kaayo nga pamolitika kini sa kongreso kay gipalabang man gyud ang termino sa barangay ug SK officials sa eleksyon sa tuig 2028.” Fezteleern!
Inantigo nga paglangan
Mi-convene na ang Senado isip usa ka impeachment court alang sa pagdungog sa impeachment case ni Bise Presidente Sara Duterte ug mipalabang gilayon kini og resolusyon nga nag-uli ngadto sa kongreso sa articles of impeachment. Wala hinuon gi-dismiss sa senado ang impeachment case. Inantigo kining pagpalabang sa maong resolusyon sa mga kaanib sa bise presidente. Dili na sila maakusar nga giyak-an nila ang impeachment case apan milampos sila paglangan, bisan makadiyot lang, sa pagdungog sa kaso. Haum ang panultihon nga “Daghan’g paagi kon unsaon pagpanit sa iring.” Muleeng!
Hulmigas ra’y andam
Namahayag si Press Officer USec. Atty. Claire Castro nga andam na ang mga hingtungdan’g ahensiya sa kagamhanan sa pag-tubag sa epekto unya sa ting-ulan labi na kay magsugod na ang klase sunod semana. Lain na usab kini’ng pagpangandak sa Malacañang kon basehan nato ang atong kasinatian sa responde sa gobiyerno kabahin sa mga katalagman. Matud pa sa akong amigo, “Mas motuo pa ko kon mga hulmigas ang moingon nga andam sila sa ting-ulan. Apan kon si Castro ang mosulti, ambot lang. Kon motoo mo ni Castro, ayaw na lang mo too nga naay ginoo.” Madahaan!
Wala makakobra
Gikataho nga aduna pa’y kapin sa 4,000 ka mga senior citizen sa Cebu City nga wala pa maka-kobra sa ilang financial assistance gikan sa dakbayan. Tulo ka adlaw ang gigahin sa pagpanghatag sa financial assistance didto pa gayod mismo sa barangay, apan daghan gihapon ang wala mokubra. Komento pa sa papila ka observers, “Aduna’y pipila ka posible’ng rason ngano nga wala makobra ang hinabang: 1. Walay apo nga mi-agak sa apohan pag-adto sa barangay; 2. Mitaliwan na ang benepisyaro; ug, 3. Tumo-tumo ra ang ngalan diha sa listahan sa pipila ka benepisyaryo.” Fishkots!
Pait pa’s panyawan
Mimando si LTO Chief Vigor Mendoza nga paimbestigahan ang dul-an sa 160 ka medical clinic sa tibuok nasud tungod sa giingon’g anomaliya sa paghatag og medical certificates bisan walay aktwal nga physical check-up nga gihimo sa aplikante. Lain na usab kini’ng paukyab sa liderato sa LTO. Baniog na nga kini’ng maong mga clinic kunsabo sa mga opisyal sa LTO. Gani, kadaghanan sa mga clinic anaa man mahimutang mismo sikbit sa buhatan sa LTO. Komento pa sa uban, “Kining pamahayag sa hepe sa LTO mapanag-ing sa pag-inom og panyawan, maka-ayo sa balatian apan pait kaayo tunlon." Pagkatoytoy!