Nagkaanam og kainit ang tensyon sa Senado nunot aning panagbangga sa duha ka habig kun ipadayon ba o dili ang impeachment trial batok ni Bise Presidente Sara Duterte.
Nagkainitay, nagtinaasay sa ilang mga tingog. Subay sa Batakang Balaod o Konstitusyon, ang mga sakop sa Ubos Balay Balauranan maoy unang moimbestigar sa mga tag-as nga opisyal sa gobiyerno nga ang posisyon matangtang lamang pinaagi sa impeachment.
Ang mga miyembro sa Senado kun makadawat sa articles of impeachment gikan sa Lower House kinahanglang mag-convene isip impeachment court ug ang magsilbing mga hukom mao ang mga miyembro sa Senador.
Bugtong ang presidente, bise presidente, sakop sa Korte Suprema, sakop sa Constitutional Commissions (Civil Service Commission, Commission on Audit, and Commission on Elections), ug Ombudsman, lamang ang pwedeng ipa-impeach.
Kining impeachment pormal kini nga proseso pagpatangtang sa mga tag-as nga opisyal sa gobiyerno kun mapamatud-ang nakahimo sila og "culpable violation of the Constitution, treason, bribery, graft and corruption, other high crimes, or betrayal of public trust." Si VP Duterte gi-impeach sa Lower House tungod sa pasangil nga graft and corruption may labot sa kontrobersiyal nga paggamit niya sa confidential funds ug ang paghulga niya sa kinabuhi ni Presidente Ferdinand Marcos Jr., kapikas nga si First Lady Lisa Araneta Marcos ug House Speaker Martin Romualdez.
Ang 19th Congress mapupos na karong Hunyo 30 maong gusto kinahanglan nga masugdan na ang impeachment trial subay sa nalatid sa Konstitusyon.
Ang pipila ka sakop sa Senado mapupos na ang termino karong Hunyo 30 ug mosugod na sab og lingkod ang mga nasublian sa katungdanan ug mga bag-ong napiling senador sa nakalabay nga eleksyon sa Mayo 12.
Kun muryo-muryohon kini sa kasamtangang Senado, nabalaka ang ubang senador nga mawad-an na og pagsalig ang katawhan kanila. Unsa pa may gamit sa Senado kun sila mismo dili mosunod sa Konstitusyon?