Dear Atty. Divine,
Maayong adlaw attorney. Naa koy ipangutana nimo kabahin kini sa yuta nga akong gidata datahan sa bukid. Ang tag-iya kay kaliwat rang mama. Ang gidak-on sa akong gipalit 1000 square meters and payable siya for 5 years og nag bayad ko og 10 mil pesos matag buwan apan wala pa ko katunga sa pagbayad. Ang akong pangutana, pwede ba nako mapasukod ang yuta bisag wala pa ma impas? Ang gusto sa owner kay inig impas na daw. Gusto lagi nako nga mapasukod daan kay mag himo ko og gamay nga payag kun mosugot ang tag iya. Daghang salamat.
Jen,
* * *
Dear Jen,
Kun installment ang imong pagpalit, kinahanglan nga aduna moy pirmahan nga Deed of Conditional Sale nga diin nakalatid kun unsay gidak-on sa yuta nga imong gipalit, ang description sa yuta, total selling price, pilay monthly nga bayranan og kanus-a impason sa pagbayad. Kun ma fully paid na kini nimo, kinahanglan nga before sa last nimong payment ipasukod na ang imong 1000 square meters aron mabutang ang description niini sa Deed of Absolute Sale nga pirmahan sa tag-iya og dayon ipa-notarized ang dokumento. Kon gusto nimo nga bisan wa pa ma-impas magpasukod naka kay magtukod ka og payag, magdepende gyud ni sa tag-iya kun mosugot ba siya. Hinuon kining pagpasukod mamahimo kanang buhaton bisan kun wa pa maimpas ang pagbayad, apan ang pagtukod og payag sa yuta nga imong napalit dili pa kini mahimo gawas lang kon adunay pagtugot sa tag-iya kay ang property nga imong gidata-datahan maangkon lang kini nimo sa hingpit kon imo na kining ma fully paid. Thank you and God bless. -- Atty. Divine
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo