Mahinungdanon kaayo ang asin kaniadto ug gani hangtud karon. Ang asin gamiton sa pagpreserbar sa pagkaon.
Ang asin mahinungdanon kaayo nga tungod niini gihimo kining suhol. Gikan sa pulong “salis” ang atong nahibaw-an nga pulong “SALARY” kun sweldo.
Kaniadto usab ibulibod ang asin sa pinauga nga hugaw sa kabayo aron himoong sugnod. Anaa usab ang asin gamiton sa mga ritwal sama sa eksorsismo. Ang asin simbolo sa kalimpiyo ug kalunsay.
Gilimpiyo niini ang bisan unsang mahugaw ug langsa o lang-og.
Mao nga ang mga Diwata ug mga Espiritu nga elemanto dili ganahan sa asin. Ug ang mga diwatahan sa paghalad halad ang momando man nga kinahanglang nga hinalad nga karne sa mananap dili pabutangan og asin.
Ang kahayag mahinungdanon kaayo natong mga tawo, gawas nga mas dali alang kanato ang paglihok diha sa kahayag, simbolo usab kini sa dakong tahas alang kanato nga mamahimo kitang mga kahayag ngadto sa mga tawo nga naglakaw sa kangitngit.
Mao nga kaniadto adunay tungtunganan sa suga nga sarang mohayag sa tibuok panimalay.
Sa atong panaw sa pagtuo ug ning tuig sa Yubileo sa Paglaum, atong hatagan og igong paglaum ang uban ingon man kita, molaum sa gihapon nga taliwala sa atong mga kakuwangan ug kahuyangan mamahimo gihapon kitang asin ug kahayag sa uban.
Unta dili kita maluya sa paghunahuna nga ang Dios mosalibay kanato kay alang nato wala kitay kapuslanan.
Mahal kita sa Dios ug dili kita disposable apan kun dili kita mohimo og mga lakang sa pagsubay sa dalan sa katarong nan, matunobtunoban kita ug masunog daw uhot ug tunobtunoban sama sa tai.