Nagkadaghan na ang panawagan nga ipadayun ang impeachment trial ni Vice President Sara Duterte-Carpio human nga ang Senado wala na magkasinabot tungod sa paglinabanay sa mga miyembro niini sa ngalan sa ilang mga partido.
Dili ikalimod nga politika ang hinungdan aning tanan. Apan dili sab angay isalikway nga ang sagradong mekanismo aron mapanubag ang si bisan kinsang opisyal sa gobiyerno kun gikinahanglang tugkaron ang kamatuoran ug hustisya para sa tanang Pilipino.
Ning bag-o, napuno sa nanawagan sa pagpadayon sa impeachment trial ang nagkadaiyang dagkong unibersidad sa Pilipinas. Dili lang nga militante, o mga organisasyon kondili hasta na ang mga tunghaan gustong mahatagan og higayon ang bise presidente nga tubagon ang mga pasangil kaniya.
Ang bise presidente gi-impeach sa Ubos Balay Balauranan tungod sa kontrobersiyal nga anomalya sa paggamit niya sa iyang confidential funds, pundo sa DepEd ug ang pagbuhi niya og hulga sa kinabuhi sa naglingkod nga presidente, Presidente Ferdinand Marcos Jr., iyang kapikas nga si First Lady Lisa Araneta Marcos, ug si House Speaker Martin Romualdez.
Ang bola naa na karon sa Senado, apan si Senate President Chiz Escudero mura og gihimo ang tanan aron mapugngan kining mahitabo.
Dunay nanggawas nga report nga matud pa dunay gipatuyok karon nga draft resolution nga nagtinguhang i-dismiss ang impeachment trial ug dili na kini ipaubos pa sa trial.
Ubos sa 1987 Constitution, ang impeachment trial mao ang labing maayo ug makatarunganon nga proseso aron mapanubag ang pinakataas og katungdanan sa gobiyerno sa mga pasangil kanila, anhi sab ang hustong venue aron madepensahan nila ang ilang kaugalingon batok sa mga akusasyon diha nila.
Ani nga proseso, masiguro sa katawhang Pilipino nga bisan unsa pa kataas ang posisyon sa usa ka opisyal sa gobiyerno, manubag sila kanila sa ilang mga gipanghimo dili maayo para sa Pilipinas.
Kung dili kini buhaton, mahimo kining sumbanan sa ubang mga opisyal nga dunay dili maayong gipanghimo unya sa katawhan kay dili naman sila gukdon ug silotan.