Nahibawo na ta kinsay nagsugo ni Kongresista Duke Frasco sa dili pagpirma sa manifesto sa pagsuporta ni House Speaker Martin Romualdez. Kay si Frasco wala mabantog sa katakos sa pagbarug sa iyang kaugalingong mga tiil. Human napaso sa pagpirma sa impeachment complaint batok ni Bise Presidente Sara Duterte niaging Pebrero, dili siya mangahas sa pagsalida sa nasudnong politika nga walay pagtugot gikan sa naggawong niya.
Nahibawo na sab ta unsa ka-insecure si Romualdez. Nga bisan unsang hulga sa iyang liderato magpalaban ug magpapirma dayon sa sipsip niya nga mga kongresista.
* * *
Nganong gisugo man ni outgoing Governor Gwen Garcia ang iyang umagad sa pag-isnab ni Romualdez? Wala ba siya mabalaka nga ang gikaintapan nga kamaginukdanon ni Romualdez motunglo sa ikalimang distrito ug sa mga distrito sa iyang alyadong mga kongresista nga wala sab mopirma nga maglaway lang sa mga proyekto gikan sa nasudnong gobyerno?
Nagduda ba si Garcia nga si Romualdez ang responsable sa iyang pagka-suspenso? O sa ka-desperada karon sa iyang panghunahuna nakumbinser ba nga dunay labot si Romualdez sa gi-imbentong mga maniobra sa pagpilde niya sa niaging eleksiyon?
* * *
Pasiunang mga timaan nagpakita nga ang ‘One Cebu’ ni Garcia nahimo nang ‘Sugbuak.’ Kay lima na ka kongresista sa Sugbo ang ni-amen ug nisuporta ni Romualdez: Silang Rhea Gullas sa unang distrito, Edcel Galeos sa ikaduhang distrito, Edu Rama sa Cebu City South District, Lolypop Ouano sa Mandaue ug Ahong Chan sa Lapu-Lapu.
Human sa pagkalubong niadtong Mayo 12, dili na magamit ni Garcia ang naandang panghudlat nga siyay nagkontrolar sa 3.4 milyones ka rehistradong mga botante sa Sugbo.
* * *
Modagan o dili si Kongresista Yedda Romualdez sa Sugbo, pait nga kalbaryo para sa grupo ni Garcia ang mosunod nga tulo ka tuig. Gawas nga maglaway sa binilyon ka pesos nga tinuig nga budget sa Kapitolyo, nga sa gusto niya o sa dili kontrolahon nang Governor-elect Pam Baricuatro, dili nang kapaabot si Garcia sa naandang suporta sa Malakanyang.
Nga importante unta kaayong panagang sa daghang mga kaso nga posibleng ipasaka batok niya. Kon masubay nang Baricuatro ang tanan niyang mga tinagoan sa 21 ka tuig nga pagpanghawod sa politika sa Sugbo.
* * *