Tangtangon sa kontra

Nangayo ang COMELEC og tabang sa mga kagamhanan’g lokal sa pagbaklas sa mga campaign materials nga nakalapas sa mga lokal nga polisiya ug regulasyon.  Sagad sa mga lider sa lokal nga kagamhanan mga kandidato man busa gitoohan nga magpabungol-bungol lang sila ni’ng hangyo sa COMELEC.  Matud pa usab sa akong amigo, “Dili na kinahanglan mohangyo ang COMELEC kay mismo ang supporter sa magka-ribal nga mga kandidato mao ra man ang motangtang sa poster sa ilang mga kontra.”  Madahaan!

Mas dako’ng suliran

Mipasaka og petisyon ang National Confederation of Labor (NCL) ngadto sa COMELEC aron suspendihon sa naulahi ang pagprinta sa mga balota alang sa 2025 elections aron mahatagan og higayon ang COMELEC sa “paglimpyo sa listahan sa mga kandidato pinaagi sa pagtangtang sa mga dili kwalipikado nga kandidato.”   Piniliay man kaha ang atong buhaton karon’g Mayo 2025 busa kon gusto ang NCL nga mga kwalipikado’ng kandidato lang ang molusot, maayo pa nga ilang ikampanya kadto’ng mga angayan.  Mao kini giingon nga, “Ang solusyon nga gisugyot mas dako pa hinoon nga problema kay sa problema nga buot sulbaron.”  Fezteleern!

Made in China

Gikataho nga gikompiska sa NBI ang mokabat P8 milyones ka pesos nga footwear sa operasyon nga gipahigayon sa ahensya didto sa Tondo, Manila ngadto sa 5 ka tindahan nga gi-akusar sa salaod nga trademark infringement. Nasakmit sa maong operasyon ang 1,502 ka mga paresan sa peke nga mga footwear.  Ni’ng atong panahon karon, uso na ang mga peke dili lang sa mga butang kon dili apil na usab ang tawo.  Sagad ni’ng mga peke nga butang nag-gikan sa China.  Matud pa sa pagya-komedya, “Gihimo sa Diyos ang langit ug ang yuta; ang uban, gihimo na sa China.”  Ateerr!

Dili makaayo’g ap-ap

Usa ka “bogus” nga doktor nga gihinganlan og Roel Fernandez Bacus ang gidakop sa mga operatiba sa NBI-Central Visayas sa usa ka entrapment operation didto sa Bargy. Basak-Pardo, Cebu City.  Giingon nga mohimo ang suspetsado og face and body enhancement sa iyang mga biktima apan nabuking kini tungod sa mga komplikasyon nga nahiagoman sa iyang mga pasyente.  Daghan ang magpakaaron-ingnon ug mopahimulos sa banidad (vanity) sa tawo aron makakwarta.  Makapahinumdum sa komedya sa akong amigo kabahin sa mga law graduates nga  nakaangkon na sa titulo nga ‘Juris Doctor.’  Miingon siya nga, “Mao ra ni doktor nga dili gani makaayo bisan na la’g ap-ap.”  Fishkots!

Serbisyo ang mahinungdanon

Adunay laraw si Cebu City Councilor Pastor “Jun” Alcover nga i-institutionalize ang uniporme sa matag departamento sa City Hall aron malikayan ang pag-usab-usab niini sa panahon nga magbag-o na usab og administrasyon.  Gawas sa uniporme, daghang suliran ang giatubang karon sa dakbayan nga angayan unahon pag-atiman ug hataga’g kasulbaran sa mga namunoan.  Matud pa bitaw, “Bahala’g nag-tsaliko ra ang mga empleyado basta world-class ang ilang serbisyo. Mag-unsa man na’ng empleyado nga posturawo, apan ang serbisyo walay ayo.”  Pagkatoytoy!