Paugdo’s sampot

Karong panahona, usa ka maayong pangwarta ang pagpahigayon sa gitawag og “aesthetic plastic surgery” kon pag-usab sa porma sa lawas sa usa ka tawo, ilabi na kadtong gustong magpagwapa, magpagwapo, apil ang mga bayot nga magpabugdo sa ilang dughan ug sampot.

Duna may mga transgender, nagpailis sa ilang kinatawo aron mora na gyud sila’g babaye. Unya aron gyud mahingpit nga mahisama sila sa babaye, mabugdohon nila ang ilang dughan ug sampot, himoon nga pinaigwad.

Ang uban kanila mogasto gyud, kay mahal baya ang pagpausab sa imong kinatawo. Sagad adto kini himoa sa Thailand, ug mogasto ka pa’g plite ug bayad pa sa pagpausab sa kinatawo.

Nakahukom ko nga hisgotan kining mao nga isyu kay may nadakpan man gud ang National Bureau of Investigation (NBI) nga usa ka “fake doctor” nga nag-operate og reconstructive surgery, ug cosmetic surgery.

Dili usa ka doktor si Roel Bacus nga naila sa iyang angga nga “Mommy Debs” nga nag-operate og clinic sa iyang panimalay diha sa Barangay Basak-Pardo ning siyudad sa Sugbo.

Matud ni NBI-7 Regional Director Renan Augustos Oliva nga dunay mga kliyente si Bacus nga midangop kanila ug mireklamo kay nakasinati sila og komplikasyon human sila naoperahan ni Bacus.

Basta maghimo gani ka niining maong matang sa trabaho, kinahanglan nga usa ikaw ka doktor, kay delikado kini. Tan-awa, dunay mga pasyente nga imbes mogwapa ug monindot ang lawas, naproblema na hinuon.

Karon, mag-atubang na hinuon si Bacus og kaso nga Illegal Practice of Medicine ubos sa RA 2382, ingon man Estafa ubos sa ART 315 sa Revised Penal Code.

Matud ni Direktor Oliva nga usa sa mga kliyente ni Bacus mitug-an nga nakabayad siya’g P20 mil aron moigwad ang iyang sampot, apan miresulta nga nagsakit na hinoon ang iyang hawak ug kalawasan.

Mao na diha, ayaw gyud mo pagkumpiyansa. Kon ang clinic sa gituohan ninyong doktor naa ra gani sa panimalay, angay ka na nga magduda.

Dili nato mabasol kadtong magpa-opera aron mogwapa, kay mao na kana karon ang modus. Daghan ko’g mga kaila, babaye’g lalaki nga kaniadto, igo-igo ra gyud ang hitsura, pero mikalit man og kahamis ang nawong?

Unya, miputi. Aw, duna ko’y kaila nga kwartahan, iya gyud ko nga giingnan nga ang iladong doktor sa Manila nga maoy dangpan sa mga artista, mao usab ang iyang giduol.

Balikon nako, way problema kon magpanindot mo sa inyong mga nawong, lawas, apan siguroa nga doktor gyud ang mohimo niini. Ayaw gyud isalig ang inyong kaugalingon nga eksperimentohan sa usa ka fake doctor.