Budget ni Sara
Gipahibawo ni Bise Presidente Sara Duterte Carpio nga motambong siya pagtuki sa plenaryo sa Senado sa iyang gipangayong mas dakong budget para sa sunod tuig 2025. Sukwahi ni sa iyang pagdumili pagtubag og mga pangutana sa unang deliberasyon sa House Appropriations Committee ug dayon sa ikaduhang tigom sa komitiba ug sa tulo ka adlaw nga paghuwat sa mga kongresista atol sa plenary debates.
Mahimong nakaamgo sa negatibong reaksiyon sa publiko sa pagdumili pagpanalipod sa iyang budget ug pagpasabot sa iyang gasto. O tingali gipasaligan nga mas mahigalaon ang mga senador.
* * *
Subling gipasabot ni Carpio nga giisip niyang walay kapuslanan ang pag-atubang sa mga kongresista kay ang budget, sama sa nahitabo sa niaging duha ka tuig, maniobrahon ra nilang Speaker Martin Romualdez ug Appropriations Committee Chair Zaldy Co.
Pila na ka semana niyang gibalikbalik ang pasangil. Hangtod karon wala pa siyay napresentar nga ebidensiya. Sukwahi sa iyang awhag sa tanang namasangil niya sa pagpakita og mga dokumento. Maayo pa si kanhi Education Undersecretary Gloria Mercado kay nakasumiter sa mga sobre sa P450,000 nga iyang giangkong nadawat gikan ni Carpio.
* * *
Kon tinuod ang pasangil ni Carpio nga gihilabtan nilang Romualdez ug Co ang budget sa iyang gidumala nga Department of Education (DepEd) sa 2023 ug 2024, apil ang Senado sa iyang gitulisok. Kay dili mapatuman nilang Romualdez ug Co ang bisan unsang kausaban kon dili dasonan sa mga senador.
Kon nagduda nga nisunod ang mga senador sa gidiktar nilang Romualdez ug Co sa niaging duha ka tuig, unsa may garantiya nga dili na sila moyango bisan motambong pa siya sa plenary debates sa Senado karong tuiga?
* * *
Duha ka maniobra sa budget karong tuiga:
Una, ang P26.7 bilyones nga Ayuda sa Kapos ang Kita program (AKAP) nga wala ikonsulta sa mga senador; ug
Ikaduha, ang pagtugot sa Malakanyang pagkuha sa kuwarta sa mga korporasyon sa gobyerno, apil na sa Philippine Health Insurance Corporation (PhilHealth).
Pero walay interes si Carpio pagmatuod sa pasangil. Wala siyay tinguha pagbadlong sa maniobra sa budget nga naandan na sukad pa sa pamunoan sa iyang amahan. Basta dili lang sab hilabtan, ug dili kuti-kutihon giunsa paggasto, ang mas dako niyang budget.
* * *
- Latest
