Dili na bag-o alang sa kadaghanan ang pulong alibi, usa ka pinulongan latin nga nagsukad sa pulong alius. Sa yanong pagkahubad kini nagpasabot sa ininglis somewhere else.
Ang pulong alibi sagad nato madunggan sa mga court proceedings tungod kay mao kini ang sagad gigamit nga depensa sa mga tawo nga mag-atubang og kaso didto sa hukmanan, labi pa kadtong mga mapasanginlan nga nakahimo og krimin.
Ang legal definition niini sumala sa thefreedictionary.com, “A form of defense whereby a defendant attempts to prove that he or she was elsewhere when the crime in question was committed.”
Sa taas nga kutay sa mga desisyon sa Korte Suprema gihulagway ang alibi nga maoy labing huyang nga depensa.
Kini tungod kay kinahanglan niyang pamatud-an ang iyang lansis pinaagi sa pagkumbinsir sa hukmanan nga didto gyud siya sa laing dapit dihang nahitabo ang krimin nga gipasangil kaniya ug nga physically impossible alang niya nga maabot sa crime scene sa oras nga nahitabo ang krimin. Gituyo ni tungod kay sayon ra man gud kaayo ang paghimo og pangangkon nga didto siya sa usa ka dapit dihang nahitabo ang krimin. Gawas pa tungod sa moderno na nga mga kahimanan sa transportasyon sa pagkakaron sayon nalang ang pagbalhin-balhin gikan sa usa ka dapit paingon sa laing lugar.
Tungod sab sa kamoderno na sa panahon, moderno sab nga mga teknolohiya ang mamahimong magamit sa usa ka mapasanginlan og krimin aron pruwebahan nga siya inosente sa pasangil.
Kini sama sa footages sa mga security camera sa mga establishemento sama sa hotel ug uban pa nga dunay CCTV camera.
Ang CCTV recording sa Waterfront Cebu City Hotel maoy lig-ong kamatuoran sa Norwegian National nga si Sven Erik Berger ug sa iyang Filipina nurse nga hinigugma nga si Karen Esdrelon nga imposibling sila maoy naghimo sa krimin nga gipasangil batok nila.
Si Berger ug Esdrelon maoy gitumbok sa kapolisan nga responsabli sa pagdagit ug pagpatay sa 6-anyos nga tinun-an sa Calajoan Elementary School nga si Ellah Joy Pique niadtong Pebrero 8 sa hapon.
Gibasihan sa kapolisan pagtumbok sa duha mao ang positibo kuno nga pag-ila kanila sa tulo ka mga minor de edad nila nga mga saksi. Apan gawas sa pag-ila sa mga saksi wa nay laing ebidensiya bisan circumstantial nalang nga gikapakita ang kapolisan.
Karon ang dakong pangutana, unsa ka sigurado ang mga bata sa ilang pag-ila sa mga suspetsado? Unsa may paagi sa kapolisan pagpresentar sa mga suspetsado ngadto sa ilang mga saksi?
Duna bay police lineup diin dunay laing mga Caucasian nga tupad si Berger dihang giila siya sa mga saksi? O diritso lang nilang gipresentar nga nagbinugtong ang langyaw ngadto sa mga saksi.
Nahinumdom ko sa gamay pa kong bata nga ang akong tawag sa tanang puti nga akong makit-an, Amerkano, bisan kun sila Ruso, Norwegian o ba kaha German.
Dili kaha tungod kay way laing puti nga nakit-an ang mga saksi mao nga si Berger na alang nila maoy kauban sa babaye nga midagit sa bata? Si Esdrelon sa iyang bahin, typical nga Pinay ang iyang beauty labihan ka kumon nga susama hapit sa tanang kauban sa mga langyaw nga nia sa atong nasud. Dili kaha tinuod nga mistaken identity gyud ang nahitabo nila? Unsaon man pag-isplikar sa kapolisan ang ilang kapakyas pagsusi sa mga dapit nga gitug-an sa mga suspetsado nga ilang giadto niadtong adlaw nga gidagit si Ellah Joy Pique?
Namatud-an sa mga sakop sa media nga tinuod ang pangangkon nilang Esdrelon ug sa iyang hinigugma nga si Berger nga didto sila sa usa ka Norwegian Language School sa Gorordo ingon man sa Family Choice Restaurant sukad sa alas 3:00 sa hapon hangtud sa pasado alas 4:00 susamang oras nga gidagit ang bata.
Gikan sa restaurant midiritso ang manag-uyab sa Waterfront Hotel diin gikompirmar sab ang ilang presensiya sa hotel management, bisan ang CCTV recording sa hotel mimatuod nga wala mamakak ang duha.
Karon giunsa man nila pag-abot sa Minglanilla ug pagkidnap sa bata kun sa oras nga nahitabo ang pagpanagit dinhi sila sa dakbayan sa Sugbo?