Ang ka way kahadlok sa maghigugmaay nga Norwegian ug Pinay sa ilang pagtug-an sa mga lugar nga ilang giadtoan niadtong higayong gidagit ug gipatay ang 6 anyos nga batang babaye sa Minglanilla, nakamugna og pagduha-duha sa kapolisan kun unsay ilang tuohan, ang pamahayag ba sa mga bata nga mitumbok sa maghigugmaay nga maoy suspetsadong kriminal o kaha ang mga ebidensya nga nagpamatuod nga ang mga sinumbong didto sa maong lugar dihang gidagit ang biktima.
Usa niini mao kadtong usa sa mga kawaning babaye sa usa ka inilang hotel ning dakbayan nga nagbutyag sa ilang rekord diin nahitala ang presensya sa Sven Erik Berger niadtong higayon nga gidagit ang biktima didto sa Minglanilla.
Mao nga nakapangutana ang publiko hain may bug-at nga ebidensya, ang pamahayag ba sa maong kawani uban sa record nga opisyal niini, ug kadtong estorya sa mga bata.
Apan sa bahin sa kapolisan, igo lang usab silang mihatag og katagbawan sa bahin sa pamilya sa batang nabiktima .
Wala usab silay angayang kabalak-an tungod kay ang mga hingtungdang suspek wala maghunahuna nga mopasaka og sumbalik kiha batok sa mga kapolisan.
Kini malagmit kay bisan nahasol ug nalangay sila sa ila untang biyahe paingon sa gawas, wala sila mabalaka sanglit limpyo ang ilang konsensya kay wala silay nabuhat nga salaod.
Sa ka lig-on sa ilang pamahayag nga walay pag-usab-usab bisan tuwad-tuwaron og sukit-sukit sa taga media ug uban pang imbistigador, maglisod ka pagkombinse sa imong kaugalingon nga silay tagsala sa pagdagit ug pagpatay sa biktimang bata.
Sa laing bahin, tungod kay may suspek na ang kapolisan, mohunong na ba sila sa pagpadayon pagpangapkap og kasayoran pamasin nga may lain pang suspek nga nagpahipi ug nagpakahilom lang karong ang gisantako sa mga pagduda mao ang maghigugmaay nga gikiha na.
Hinuon mas maayo usab kining nakadangat sa hukmanan ang maong kaso buwahan to, masuta ang kamatuoran ug sa makausa pa mahanaw ang mga pagduda batok sa mga gikiha ug ang korte nay molimpiyo sa ilang ngalan ug di nalang nila igsapayan ang grabing kahasol nga ilang nasinatian sa mga abtik nga mga otoridad sa Sugbo. Di ba?