Adunay lingam massage parlor nga nag-operate sa Marina Mall sa dakbayan sa Lapulapu nga lisod nga mapasirad-an bisan walay business permit gikan sa kagamhanan sa dakbayan sa Lapulapu.
Si Lapulapu City Health Officer Rodolfo Berame mirekomendar nga sirad-an ang Healing Space Massage-Lingam Services sulod sa Marina Mall. Ang inspection team sa kagamhanan sa dakbayan sa Lapulapu nakasuta nga ang maong lingam massage parlor sa Marina Mall walay mayor’s permit ug walay sanitary permit. Nasuta usab sa inspection team nga mga lalaki lang nga mga kustomer ang makasulod sa maong massage parlor.
Maglisod ang kagamhanan sa dakbayan sa Lapulapu pagpasira niining maong lingam massage. Kini tungod kay ang maong establisamento anaa mahimutang sa Marina Mall nga gipanag-iya ni Efrain Pelaez Jr.
Kahinumdoman, pasirad-an unta sa kagamhanan sa dakbayan sa Lapulapu ang Marina Mall tungod kay wala kini building permit, apan milalis si Pelaez tungod kay matud niya nahimutang kini sa teritoryo sa Mactan Export Processing Zone.
Kun si Pelaez ang matuman, ang publiko ang makaluluoy tungod kay mahimo ra diay’ng maka-operate ang mga establisamento nga magtanyag og mga binuang ug immoral nga mga serbisyo sama sa lingam tungod kay walay lokal nga kagamhanan nga makagukod tungod lagi kay ubos sila sa teritoryo sa MEPZ.
Angayang lilion sa mga magbabalaod kini nga punto tungod kay gi-abusohan na kini sa mga magpapatigayon nga dili ganahan mobayad og saktong buhis ug dili gustong mosunod sa patakaran sa lokal nga kagamhanan.
Kun pasagdan kini, ang mga residente sa Lapulapu ang gikaon sa imoralidad, dili lamang si Pelaez ug ang mga empleyado ug opisyal sa MEPZ.