Nagbaha ang mga email, mensahe sa facebook, twitter ug uban pang website ang gipadangat sa mga tawo ngadto sa may labing daghang boto sa tanang presidentiable nga si Noynoy Aquino. Pulos mga panghinaot, pangindahay ug pabor ang gipadangat sa publiko alang sa bag-ong administrasyon. Nagkadaiyang hangyo sama sa kasulbaran sa usa ka krimen, pagkasikop sa usa ka suspek, pagsumpo sa ilegal nga droga sa ilang lugar, pag-semento sa da’n nga gikalimtan nalang su’d sa dugay nang panahon, pagpatungha sa ilang mga anak nga libre sa kolehiyo, paghatag og trabaho, pagpaminaw sa mga yangungo sa inahan, paghatag og katumanan sa dugay nang gipaabot nga hustisya sa pagpatay sa ilang kabanay. Wa’y katapusan ang mga gipangayo gikan sa usa ka Noynoy nga wa’ pa makalingkod sa pwesto.
Adunay uban nga personal na kaayo ang gipangayo nga pabor. Sama sa paghatag og balay kanila tungod kay dugay na silang nag-antos sa pag-abang og balay o apartment, paghatag og trabaho sa ilang anak nga bag-o lang ni gradwar o paghatag sa titulo sa yuta nga ilang gitikad su’d sa dugay nang katuigan. Maisip nga normal lang ang reaksyon sa mga tawo nga mopadangat sa ilang mga pangindahay labi pa nga dugay-dugay ‘sab nga nag-antos ang mga tawo sa usa ka administrasyon. Di’ lang maayong panag-ingnan nga magsugod ang bag-ong pamunoan pinaagi sa mga pamarayeg sa mga tawo sa molingkoray palang nga presidente.
Ang nakalahi sa atoa dinhi sa Pilipinas kay giisip natong mosulbad sa tanang problema ang usa ka pangu’ nga atong gipili. Atong gitan-aw ang usa ka presidente nga mopasemento sa da’n nga dugay na natong gireklamo, mopatukod og pier o pantalan sa atong dapit aron maka-biyahe na ang daghang barko, mopatukod og mga tulay alang sa mas dali nga pagpasa sa mga produkto o abot sa umahan, mopabarug sa mga fly-over, overpass o mga subway aron masolusyonan ang grabeng problema sa trapiko. Angay natong hinumduman, di’ enhinyero ang manumpaay palang nga presidente. Labaw sa tanan, wa’ siya gipili sa mayoriya sa katawhan aron tubagon ang maong mga problema nga nagkinahanglan og mga eksperto sa maong mga butang.
Wa’ kita mopili og lider nga maoy manubag sa problema sa mga pamilya kun asa mokuha og kuwarta aron ilang igasto sa pagkaon o ipatungha sa ilang mga anak. Wa’ ta mopili og presidente nga maoy atong himuong dangpanan sa tanan natong problema. Ang presidente maoy lider nga mo-andam ug mohan-ay og mga programa aron mahitabo ug matuman ang atong mga gipangandoy. Ang presidente ang molantaw sa maayong ugma sa usa ka nasud inabagan sa mga balaod nga iyang buot ipahimo sa ba’y balaoranan. Ang presidente mao ang makig-alayon sa ubang nasud alang sa malambuong ekonomiya ug mas lig-on nga relasyon.
Ang presidente di’ ang tubag sa tanan natong problema. Kana maoy angayan nga tan-awon sa matag usa kanato. Kung ang usa ka presidente palpak sa iyang mga desisyon pag-timon sa atong nasud paingon sa kalambuan, dinha pa nato siya pwedeng mapaninglan. Kung pakyas ang usa ka presidente sa paghiusa sa tanang ahensya sa gobyerno o sa mga magbabalaod alang sa malambuon ug malinawon nga nasud, dinha pa nato siya mahimong mabasol. Kun ang presidente pakyas sa pakiglambigit sa uban mga nasud aron may padulngan ang atong mga produkto o may kakuhaan sa atong mga gikinahanglan nga produkto, diha pa nato siya mahimong mabasol.
Hagit sa matag usa kanato ang motabang aron maangkon ang tinud-anay nga kalambuan paingon sa bag-ong Pilipinas. Di’ mahimong isalig sa bag-ong mga napiling lider ang tanan natong problema tungod kay bisag kanus-a, wa’ lang sa ilang mga kamot ang solusyon sa atong gimulo nga mga problema apan anaa mismo sa matag usa kanato. Dugay nang ana-a sa mga kamot sa mga Pinoy ang kalambuan apan ang nakapait kay ato lang gihatag ang tanan natong mga problema sa atong gobyerno. Ang piniliay wa’ matapos niadtong Mayo 10 diin nihugop ang katawhan sa mga presinto aron sa pagpili sa mga mosunod nga lider. Ang tinud-anay nga piniliay ana-a sa matag adlaw natong desisyon nga nagkinahanglan unsa ang atong palabihon ang ato bang hakog nga interes o interes nga may kalabutan sa katawhan ug sa atong nasud.
Ang dakong hagit nga nagpabilin nato karon sa unsang paagi ta mahimong kabahin sa solusyon ug di’ lang magpaabot sa solusyon.
Email: rico_lucena@abs-cbn.com or ricolucena@yahoo.com