Mobalik na paglingkod sa Cebu City Hall si Mayor Tomas Osmeña human sa duha ka buwan niya nga pag-leave sa katungdanan.
Gipahibalo ko ni Tommy kagahapon nga mobalik na siya sa City Hall karong Lunes.
Unsa man g’yoy rason sa pag-leave ni Tommy. Ang iya ba nga kahimtang sa panglawas? Tinuod ba usab ang pagduda sa oposisyon nga ang pag-leave ni Tommy gitumong aron makahimo siya og una-una nga kampanya sa south district?
Nananghid ko ni Tommy nga itug-an sa publiko kun ngano nga mipahuway siya pagka mayor sulod sa mohapit duha ka buwan.
Ang rason niini, mao kadtong report nga si Samantha Benitez giingong gihulga nga patyon ug ang gipasanginlan mao si Miguel, ang 24-anyos nga anak sa mayor.
Ang pag-leave ni Tommy gitumong aron mahilom ang isyu. O dili ba mihilom tinuod?
Gikuyawan man god si Tommy nga ang maong isyu nga gihulgang patyon si Samantha, sakyan sa mga kontra ni Tommy. Matud ni Tommy nga ang iyang mga kontra sa politika, apil na ang mga tawo nga nasuko kaniya, mahimong mobayad og tawo.
Tinuod, kun may mahitabo ni Samantha, si Miguel maoy madudahan. Ang report god nga nasuko si Miguel kang Samantha kay ang iyang uyab nga si Bea Villegas gibiyaan man ni Samantha nga hubog sa usa ka imnanan.
Matud ni Tommy, kun may mahitabo ni Samantha, bisan og walay labot si Miguel sigurado nga makadaut kini sa iyang political career.
Mihatag usab siya og pagpasabot nga kun ikiha si Miguel ug makonbikto bisan wala siya’y sala, dayon mohilak sa kaguol si Margot nga asawa sa mayor, makapugong ba kaha sila sa ilang supporters nga manimalos? Kining puntoha nakaingon ko nga tukma si Tommy sa iyang gihimo aron mabugnaw ang isyu. Og tuod man, nahilom kini.
Bitaw, bisan ako saksi nga dili tinuod nga ang kahimtang sa panglawas sa mayor maoy rason sa iyang pag-leave kay nag-anam gani kini kabaskog ug wala usab kini mangampanya pag-ayo diha sa south district.
* * *
Dili g’yod hingpit nga makasulbad sa problema sa pulosyon dinhi sa dakbayan ang operation sa Bus Rapid Transit gawas lang kun pahunongon g’yod pagbiyahe ang mga passenger jeepney nga nagpanawan sa rota nga agi-an sa BRT.
Apan dili kini mahitabo dinhi sa dakbayan kay ang mga passenger jeepney posible nga balhinon ra man og laing rota kay gipasalig man sa mga opisyal sa dakbayan nga walay ma-displaced kanila. Tan-aw nako pagkadaku pa g’yod sa problema alang sa katumanan sa BRT. Pananglit sa rota diha sa Talamban-Banilad, kadaghan sa jeepney nga anaa mag-agian sa maong karsada. Kapin sila sa 600 ka units.
Sa pasiuna nga kasayuran nga ilang gibutyag, aw bisan si Mayor Tomas Osmeña, mikonpirmar niini, nga mahimong dili paagion sa Governor Mariano Cuenco avenue ang mga passenger jeepney, ug mahimo gani nga iapil ang private vehicles.
Ayaw ko’g ingna nga kining maong mga jeepney dili na lang g’yod padaganon? Sigurado ko nga ibalhin ra sila og rota. Nagpasabot nga ang aso nga ibuga sa mga sakyanan, mao ra gihapon ug madugangan pa gani kay mapun-an man sa mga bus.
Kabahin tingali sa plete, mahimong barato na lang kay dili man mahal kaayo ang bus og pletehan. Apan sa kadaghan sa mga eskena nga malabyan sa BRT paingon sa ilang destinasyon, tingali dili kaayo paspas ang dagan sa mga bus.
Kini ug uban pa nga mga punto ang hatagan og pagtagad sa feasibility study nga himoon sa mga transportation experts sa World Bank ug sa Department of Transportation and Communication (DOTC).