Sulod sa daghang katuigan, gipaningkamotan gyud sa mga maalamong teologo ug pilosopo ang paghatag og usa ka pagpalawom sa Misteryo sa Santisima Trinidad. Apan kun buot huna-hunaon, ang Santisima Trinidad ang angayan lamang natong sabton diha sa atong pagsabot usab sa kahulogan ug bili sa atong tawhanon nga pakiglambigit una sa atong kaugalingon ngadto na sa uban. Ang dugokan sa maong kahiusahan sa Santisima Trinidad mao man ang gugma nga naghimo ning tulo ka persona sa Amahan, Anak, ug Espiritu Santo ingon nga usa lamang ka Dios. Mahimong puy-an kining maong konsepto diha sa atong tawhanong kinabuhi. Diha sa makanunayong pagpaningkamot alang sa kahiusahan, sa paghunahuna sa uban ingon man diha sa atong pagpaningkamot aron mamahimong lig-on ang atong katilingban nan, atong gihatagan og bili ang misteryo sa Santisima Trinidad ug kini maoy naghingpit kanato ingon nga mga tawo sa kalambigitan