Mapasalamaton kaayo kita sa Kahitas-an nga walay mga dugoong panghitabo sa Cebu atol sa piniliay niadtong Lunes ug hangtod sa iskutensiyo ug sa canvassing nagpabilin ang kahapsay.
Ang ubang mga probinsiya, ilabi na didto sa Mindanao mitumaw ang kagubot sa mga polling precincts, ug ang labing luog nga insidente mao ang pagsulong sa nag-bonnet nga mga armadong tawo sa polling precinct sa usa ka barangay sa Batangas hinungdan sa pagkamatay sa duha ka tawo, apil na ang magtutudlo nga board of election inspector, ug pagkasunog sa lawak-saringan apil na ang mga balota ug ballot boxes.
Manghinaot lamang hinuon kita nga molungtad hangtod na sa proklamasyon sa mga modaug sa miaging eleksiyon ang pagkamalinawon sa Cebu.
* * *
KALAPASAN. Wala gyud malikayi ang mga kalapasan nga nahimo sa mga partido atol niadtong Lunes nga eleksiyon.
Angayan natong dayegon ang mga pari, madre ug mga volunteers sa C-Cimpel nga aktibo kaayong nag-monitor sa mga tunghaan ug pagbadlong niadtong mga malapason sa balaod sa eleksiyon.
Ang C-Cimpel maisugon kaayong namadlong sa mga partido nga namutang og mga lamesa nga nanghatag og mga sample ballots ug dayag nga nangompanya sa mga botante duol sa mga polling precincts. Nasayod ang mga partido nga higpit nga gidili ang pagpangampanya sa mga presinto.
Bisan ang Bando Osmeña Pundok Kauswagan (BOPK) wala maka-eskapo sa igmat nga mga mata sa mga sakop sa C-Cimpel. Daghang mga tunghaan sa dakbayan nga gi-monitor sa C-Cimpel nga gipamutangan og mga lamesa sa BOPK nga duol sa mga polling precincts.
Hinuon, ang kadagkuan sa C-Cimpel mapasalamaton kaayo nga motuman lamang usab kanila ang mga tinugyanan sa mga partido nga ipamutang sulod sa mga tunghaan, ilabi na sa dihang midangop sila sa kapolisan ug sa Comelec.
* * *
DISGRASYA. Angayang may manubag sa pagkamatay sa among kauban sa buhat nga si Elly Carungay tungod sa iyang pagkadisgrasya niadtong miaging semana sa karsada nga naglagbas sa South Road Properties.
Maayong pagkapasok ni Elly sa trailer truck nga naghunong tungod kay na-abiriya hinungdan sa dakong kadaot nga naangkon sa iyang lawas.
Salamat sa Dios nga naluwas ang iyang kapikas atol sa maong disgrasya.
Kun akoy abogado sa pamilya ni Elly, maayong kasuhan ang tag-iya sa trak tungod kay may tulobagon kining sibil subay sa balaod.
Sumala sa report nga atong nadawat, nagbutang tuod og early warning device ang trak apan dili na maklaro sa motorista nga magpaingon niini tungod kay nabulit kini sa buling.
Nasayod ang drayber sa maong trak nga kun dili makit-an ang early warning device, seguro gyud nga madasmag sa sampot sa trak ang motorista, sama sa nahitabo ni Elly. Angayang manubag (damages) ang tag-iya sa trak tungod sa pagpabaya sa iyang drayber.
Apan adunay problemang masugatan ang pamilyang gibilin ni Elly sa pagpaningil og damyos sa kagamhanan sa siyudad sa Sugbo nga maoy nanag-iya sa SRP.
Nalatid sa balaod nga angayang manubag ang munisipalidad o siyudad nga makahatag og kadaot sa publiko tungod sa pagpabaya niini, sama sa kapakyas pag-ayo sa libaong sa karsada, lungag sa kanal ug uban pa.
Kun basehan ang maong balaod, angayang manubag ang kagamhanan sa dakbayan sa Sugbo tungod sa kapakyas niini pagbutang og sugang dagitab sa maong lugar ug saktong mga devices aron malikayan ang disgrasya.
Apan aduna kini ‘legal hitch” tungod kay ang karsada iya sa kagamhanang nasyonal. Sa pagkakaron, ang Department of Public Works and Highways (DPWH) ang nagdumala sa karsada nga naglagbas sa SRP (mao gani nga gidesisyonan kini sa korte nga dili angayang sirad-an tungod kay dili kini iya sa lokal nga kagamhanan).
Unya ang kagamhanang nasyonal, apil na ang DPWH dili mahimong ikiha kun wala kini pagtugot (consent).
Ang maayong ikiha niana ang mga opisyal sa DPWH nga maoy gitahasan pagdumala sa karsada sa SRP tungod sa pagbaya niini pag-atiman pinaagi sa pagpamutang og mga devices nga maglikay sa disgrasya, sama sa mga sugang dagitab.