EDITORYAL — Gun ban ipatuman gyud

Ang Comelec miawhag sa publiko sa pag-report ngadto sa ilang opisina o ba kaha sa labing duol nga presinto sa kapolisan niadtong mga tawo nga ilang nahibaw-ang nagtakin-takin og armas de fuego.

Adunay gipatuman nga gun ban ning panahon sa eleksyon ug bisan mga sakop sa militar ug kapolisan wala tugoti sa pagdalag pusil kon wala silay permiso kun pagtugot sa Comelec.

Mosanong unta ang publiko sa maong awhag sa Comelec kay bisan pa sa gipatuman nga gun ban naa gihapoy mga tawo nga misupak sa maong kasugoan. Ug dili malalis nga kadaghanan niining mga supakero mga tawong badlongon sa atong katilingban.

Sa samang higayon, higpitan sab unta sa mga tinugyanan sa balaod ang kampanya batok sa mga tawo nga maisogong mobaliwala sa balaod nga midili sa pagdalag armas ning panahona sa eleksyon.