Na-dismiss na PNP official, timbog sa droga
MANILA, Philippines — Nalambat ng mga tauhan ng Las Piñas City Police Station ang isang na-dismiss na dating opisyal ng Philippine National Police sa isinagawang buy-bust operation, sa Las Piñas City, Martes ng madaling araw.
Kinilala ang suspek na si alyas “Ibon” na kabilang sa high value individual (HVI) ng PNP at dismissed na Police Commissioned Officer (PCO) na sasampahan ng reklamong paglabag sa Republic Act 9165 (Comprehensive Dangerous Drugs Act of 2002) at RA 10591 (Comprehensive Firearms and Ammunition Regulation Act).
Sa ulat, dakong 12:20 ng madaling araw ng Hunyo 18, nang madakip ang suspek sa Saging Street corner Strawberry, Barangay CAA, Las Piñas City.
Nakumpiska ng mga operatiba ng Station Drug Enforcement Unit ang pitong plastic sachet na naglalaman ng nasa 15 gramo ng shabu na nagkakahalaga ng P102,000, isang Nissan X-trail na puti at may plakang ZRU 718, isang Redmi 6 cellphone, isang Colt 45 pistol na may apat na bala, at buy-bust money.
- Latest
