Barko ng China sa West Philippine Sea lumobo sa 251
MANILA, Philippines — Umabot sa record-high ang bilang ng barko ng China sa West Philippine Sea (WPS) sa taong ito sa 251, ayon sa Philippine Navy.
Sa press briefing kahapon sa Camp Aguinaldo, sinabi ni Rear Admiral Roy Vincent Trinidad, Spokesman ng Philippine Navy sa WPS na mula Setyembre 17 hanggang 23, nakita ng Philippine Navy ang 204 Chinese maritime militia (CMM) vessels, 28 China Coast Guard (CCG) ships, 16 People’s Liberation Army Navy (PLAN) warships, at tatlong research vessel.
Naispatan ang mga barko ng China sa Bajo de Masinloc – 2 CCGs, 2 PLANs, 7 CMMs, 1 research ship; Ayungin Shoal-9 CCGs, 62 CMMs, 1 research vessel; Pagasa Islands – 1 CCG, 23 CMMs, 1 research vessel; Likas Island – 3 PLANs; Panata Island – 2 CMMs; Escoda Shoal – 16 CCGs, 11 PLANs, 55 CMMs; Iroquois Reef – 38 CMMs.
Karamihan sa mga barko ng China ay nakita sa Ayungin Shoal at Escoda Shoal.
Ang nasabing bilang ay higit na mataas sa 203 CCG (Chinese Coast Guard (CCG) ships, PLAN warships at CMM vessel na nairekord naman mula Setyembre 3-9.
Ang pagtaas ng deployment ng Beijing ng mga sasakyang pandagat ng China sa WPS ay sa gitna na rin ng tumitinding harassment at pambu-bully ng CCG laban sa tropa ng Pilipinas na nagbabantay sa soberenya at integridad ng teritoryo ng bansa sa pinag-aagawang teritoryo.
Sinabi ni Trinidad na ang presensya ng maritime militia, PLA Navy at Chinese CCG ay illegal sa simula’t sapul kung saan ang nasabing alarma ay pinuna na at kinondena ng AFP sa pag-uumpisa pa lamang ng reclamation actitivities ng China sa illegal nitong presensya sa WPS.
- Latest