Lola na tumatawid todas sa bus
Driver umarangkada kahit pula na ang stoplight
MANILA, Philippines — Namatay noon din ang 57-anyos na lola matapos na masagasaan at pumailalim sa gulong ng bus nang habulin ng driver ang stoplight kahit pula na ito naganap sa Quezon City, kamakalawa ng gabi.
Kinilala ang nasawi na si Erlinda Linay Aguilar, ng Escopa IV, Quezon City habang naaresto ang suspek na si Jose Siguerra, 51-anyos at residente ng Better Living Subd., Parañaque City.
Sa report ng Quezon City Police District (QCPD) Traffic Sector 3, alas-6:00 ng gabi nang maganap ang aksidente sa P. Tuazon kanto ng J.P Rizal, Brgy. Marilag, Quezon City.
Sa imbestigasyon, nasa kalagitnaan ng pedestrian lane ang biktima nang biglang kumaliwa ang Daewoo Truck Bus na minamaneho ni Siguerra sa intersection, at nasalpok ang biktima.
Sinabi ni Brgy. Marilag responder Danilo Gapas, hinahabol umano ng bus driver ang stoplight kaya ‘di napansin na may tumawid na matanda.
Ayon sa driver, hindi niya nakita ang matandang tumatawid kaya niya nasagasaan nagulat na lamang siya nang may kumalabog sa bandang likuran.
Inihahanda na ang kasong reckless imprudence resulting in homicide laban sa bus driver.
- Latest
