Huyhoy ang abaga ni Ramon nga mibiya sa ilang panimalay. Nakahukom siya nga mopahilayo lang una ni Linda, iyang asawa, samtang nagdilaab pa ang pangabubho niini kaniya. Nahadlok nga masagpaan kini niya sa sigi niini og yawyaw. Dili maminaw sa iyang patin-aw. Kanunay’ng molabaw ang tingog, paila nga siya maoy hawod. Sakit man ang pagbiya, apan kinahanglan nga iyang buhaton aron kini makamatngon sa kamingaw nga bation diha sa iyang pag inusara.
Karon sa iyang pag-inusara ni Linda, nanglugok ang mga luha nga namalandong sa kamahunahunaon ni Ramon kaniya. Mapinanggaon kini kaniya. Manimba sila matag Miyerkules sa Redemptorist Church sa Sugbo. Manuroy sa Ayala ug SM. Mangaon sa mga mahalon nga kan-anan. Walay suliran sa inadlaw’ng gastuhan. Wala sila maglisud sa ilang mga panginahanglan. Masubraan pa gani ang kuwarta nga ipadala sa ilang anak matag bulan. Malinawon ang ilang pagpuyo sa dakong balay nga gipahimo sa ilang duha ka anak nga babaye nga pulos nakabana og Amerikano ug atua na manimuyo sa Amerika. Sa laktud nga pagkasulti, malipayon ang ilang panag-uban.
Nitumaw ang kaguol sa ilang panag-uban dihang miapil si Ramon sa politika. Numero uno siya sa mga napili nga kagawad sa ilang barangay. Tungod sa iyang ambisyon nga magpapili sa pagka-kapitan sa barangay, sayo kaayo nga nangampanya sa hilom. Kanunay niyang gikuyogkuyog si Layla, iyang sinaligang lider sa mga batan-on. Ang kanunay’ng pagkuyogkuyog ni Ramon ug Layla, gihimoan og estorya sa mga balhibuon og baba sa barangay hall. Ang maong estorya nagsunib og pangabubho sa kinailadman ni Linda.
Aron mamatud-an ni Linda kun unsa ka tinuod ang estorya nga iyang nadungog; usa ka udto, miadto siya sa barangay hall. Wala tuod didto sa Ramon. Namatud-an niya nga si Ramon mopakita lang og kadiyot sa barangay hall ug mawagtang lang dayon. Hikit-an nalang kini nga kauban ni Layla nga maniudto sa kandingan sa SRP. Nagdilaab ang pangabubho ni Linda nga mipauli sa ila. Pag-abot ni Ramon sa ila, iya dayon kining gibinaboy og kasaba. Wala na maminaw sa patin-aw ni Ramon. Naputol ang pamalandong ni Linda dihang may mihikap sa iyang abaga. Sa iyang pagyanghag maoy iya nakita si Ramon nga mapahiyumon. Sa walay pangutana iyang kining gigakus. Naghilak nga nangayo og pasaylo: “Pasayloa ko Mon nga wala ko paminawa ang imong pagpatin-aw. Nangibabaw ang akong pangabubho tungod sa akong dakung gugma kanimo. Namatngonan ko na kun unsa kahaw-ang ang akong kinabuhi kun wala ka. Ang imong pag-apil-apil sa politika maoy nakaingon niining tanan. Sukad nga miapil ka sa politika, nagkalisudlisud na hinuon ta. Halus wala kamay panahon alang natong duha. Ang imong suweldo ug bahin ang ipadala sa atong mga anak matag bulan, mahurot lang dayon. Ang sakit nga bation, nga kadaghanan sa imong tabang maadto sa mga tawo nga imong gituhoang maayo, apan kusog diay kaayong mamikat inigtalikod nimo.”
“Kalimti na ang tanan dautan nga anaa sa imong hunahuna. Tawga hinuon ugma ang atong mga anak. Sultihi nga ang kuwarta nga ilang gigahin alang sa akong pangampanya sa umaabot nga eleksiyon sa barangay, ila nang ipadala aron atong magasto sa paglulinghayaw sa Oropa atol sa kanonisayon ni Blessed Pedro Calungsod nga himuon sa Roma. Dili na ako moapil sa politika aron dili kana magduda. Karon na lang hinuon ka mangabubho nga sa atong pangedaron ang ulag agdahunon.”
“The spirit is strong but the flesh is weak,” nagdungan pag iningles ang duha. Nangatawa ug naggaksanay nga nanulod sa kuwarto aron tilukon ang linugdang sa pangabubho. (Kataposan)