Gula 13
“Are you alright?” Gitutokan ni Jeffrey ang nawong ni Danica.
Igo lang miyango si Danica. Miduko siya nga naghapuhap sa iyang dughan. Nangluspad pa siya tungod kay wala pa siya maulii sa hingpit gikan sa kahikurat niya sa paglayat sa ihalas nga mananap.
“Relaks lang,” matud ni Jeffrey nga mipahiyom aron pagpakalma kaniya. “Iring lang kadto. Labaw pa to siyang nalisang nato.”
Misaka si Jeffrey sa hagdanan sa payag nga may tulo lamang ka ang-ang ug milili ngadto sa sulod. Unya giagda siya niini sa pagsaka.
Nag-ukon-ukon si Danica. Pero dihang miusab pag-agda si Jeffrey kaniya sa pagsaka sa payag, iya na kining gipaundayonan.
“Mamahuway una ta dinhi,” nagkanayon si Jeffrey sa dihang didto na silang duha sa sulod sa payag. “Nasayod kong gikapoy ka.”
Wala siya motingog.
Gibutang ni Jeffrey ang dala niining bag sa salog nga kawayan sa payag. Giablihan sa lalaki ang bag ug gihabwa niini ang mga pagkaong delata ug tasty bread. Nagpagawas usab si Jeffrey og duha ka botelya sa mineral water. -- Sumpayan pa