Duha ka dagway sa gugma

Hugyaw ang buwan sa Mayo alang sa mga taga Calape, lalawigan sa Bohol. Sigurado gyud nga mag-ambahan ang mga Bol-anon tungod kay karong Mayo 9 dili lang usa ka sikat ug lig-on nga mag-aawit ang molingaw kanila kondili duha na kansang mga nawong kanunay nga makita sa nasudnong telebisyon. Sila walay lain kondili si Mr. Pure Energy Gary V ug Divine Diva Zsa-Zsa Padilla. Ang pagdapit sa duha ka mga celebrity gitumong sa mga kakaghanan sa Calape aron ma-hugyaw og maayo ang pagbati sa ilang mga katagilungsod ug sa mga lumolupyo sa kasikbit nga mga dapit nga nagtamod ug nagdayeg sa talento ni Gary V ug Zsa-zsa.

Ang linawas nga pasundayag sa duha ka mga inilang personalidad mahitabo atol unya sa Pahinungod Festival nga sa nasayran na ipahigayon karong Mayo 9. Si Calape Mayor Ernest Herrera II mitug-an sa Banat Hugyaw nga daghan na kaayo sa mga mulopyo sa probinsya ang miisip kanila ni Gary ug Zsa Zsa nga ilang mga idolo gumikan sa ka maayo nga mukanta ingon sa mga nahisgutan nga sigurado gyud nga makahatag og tiunay nga kalingawan. Ang kasikat sa duruha didto sa probinsya sa Bohol naggumikan usab kay makita sila matag Dominggo pinaagi sa variety show sa ABS-CBN, ang nabantog na usab kaayo nga ASAP.

Ang nahisgutan nga konsyerto nga pagaulohan "Faces of Love" ubos unya sa direksyon sa inilang musical director sa kaulohan nga si Mon Faustino diin moabag usab ang Powerplay band.

Gitug-an ni Herrera nga sa nakalabay nilang tinuig nga kalihukan nahimong dinapit sa lungsod si Gary. Apan karon kumbinsido sila nga mas haom nga mag-uban ang duruha sa usa ka pasundayag human usab sa kalampusan sa " Faces of Love" didto sa kauluhan niadtong Pebrero. Dako ang pagsalig ni Mayor Herrera nga makahatag ang umaabot nga pasundayag sa duruha didto sa iyang lungsod og dakong katagbawan dili lang sa mga mulopyo sa iyang lungsod kon dili sa silinganan usab nga kalungsoran sa tibuok probinsya.

Gipaabot nga paambitan unya ni Gary ngadto sa mga Bol-anon ang mga kanta sama sa "Baby It's Cold Outside, They Can't Take That Away from You, Cheek to Cheek ingon man Love Was Made for You and Me." Pakapinan usab unya kini niya sa lain pang mga awit sama sa Tears on My Pillow, Earth Angel, In the Still of the Night, Put Your Head on My Shoulders ingon man ang mga romantic Original Pilipino Music ballads nga siguradong mogitik sa pagbati sa mga romantikanhon sama sa Sana ay Ikaw na Nga, Kailangan Ko'y Ikaw, Di Na Natuto ug Ikaw Lamang. Of course dili puedeng dili ilakip ang mga sipra nga kanta ni Gary sama sa "Di Bale na Lang, Eto na Naman ug Shout for Joy."

Samtang moabag usab si Zsa Zsa pinaagi sa mga kanta niya nga gikahinaman na sa publiko kaniadto pa sama sa Kahit Na ug Hiram gawas sa teleserye medley nga maglakip sa mga kanta nga Mula sa Puso, Kay Tagal kang Hinintay ingon man ang Hanggang sa Dulo ng Walang Hanggan.

Si Mayor Herrera miingon nga ang maong kalihukan kabahin sa iyang tinguha nga mahimong Entertainment Capital sa tibuok probinsya sa Bohol ang lungsod sa Calape sanglit sila man ang dunay labing bag-ong Cultural Center nga labihan ka wanang.

Busa gipaabot nga maghugop ang mga taga-Calape ug mga lomolopyo sa kasikbit nga mga dapit gawas pa nga daghan na usab nga mga balikbayan ang gikatakda nga motikeng aron moambit sa kasaulogan sa tinuig nga pangilin ingon man sa Pahinungod festival.

Kadtong gusto musaksi sa konserto mahimong motawag sa CITICkets nga adunay telepono 412-4512, 2326888 ug sa munisipyo sa Calape sa telepono -038-507-9085 ngadto na sa 9180 alang sa dugang impormasyon.