Desperadong Cayetano

Pila ka adlaw sa wala pa madakpi si Senador Jinggoy Estrada niadtong Hunyo 1, wala na motubag si Senador Chiz Escudero sa mga tawag sa telepono gikan sa iyang mga kauban sa kanhi majority bloc. Nahibulong nang daan silang kanhi Senate president Alan Peter Cayetano ug kaubanan sa wala pagpakita ni Escudero sa sesyon niadtong Mayo 26. Nga na-adjourned tungod sa walkout sa kanhi minority bloc.

Mas naalarma si Cayetano dihang hastang iyang mga tawag wala na sab tubaga ni Escudero. Kon mobali si Escudero, goodbye bunot ang iyang liderato.

Dihang wala paminawa ni Interior Secretary Jonvic Remulla ang iyang awhag nga tahuron ang tradisyon sa Senado sa pagsuway paglangay sa pagdakop ni Estrada, makapasubo nga mga numero ang iyang gihunahuna:

Bisan dili mobali si Escudero, 11-11 ang kamara sa Senado, dili na mapasar ang remote voting amendment nga mao ray maka-preserbar sa iyang mayoriya; ug

Kon mobali si Escudero, mapalagpot siya sa puwesto.

Maong, sama sa naandan, gipamatud-an niya nga si Alan Peter Cayetano para lang ni Alan Peter Cayetano: Bisan siya ang pangulo, gi-boykot niya ang mga sesyon sa Senado sa Hunyo 1, 2, ug 3.

Nag-usab-usab ang iyang rason: Niadtong Lunes, giawhag niyang minority bloc pagbarug uban niya para sa kagawasan sa Senado; pagka Martes, niangkon nga ang boykot panimawos diay sa walk out sa minority bloc. Niyango sang kasagaran sa mga sakop sa kanhi majority bloc kay ganahang magpabilin ang ilang mga komitiba ug pagkontrolar sa Senado. Pero duna diay giluod na sa salida ni Cayetano.

Gawas ni Escudero nga nibiya niya niadtong Hunyo 3, nahadlok si Cayetano nga kay dunay lain nilang kauban nga wala magpakita niya sulod sa pila na ka adlaw. Kon mobali sab, mahimo nang 13 ang bag-ong majority bloc ug pormal nang mapili si Sherwin Gatchalian nga Senate president.

Maong bisan unsa na lay nahunahunaan ni Cayetano aron makuha pagbalik ang iyang puwesto. Pero gawas nga wala siya pabori sa balaod, nagkahiyos pa g’yud ang iyang mga numero. Human gibasura ni Gatchalian ang iyang gisugyot nga power sharing, nipasidaan nang National Bureau of Investigation nga dunay seryusong hulga sa seguridad sa Senado.