Kuyog sa demonyo

Sa wala pa mapili nga senador si Erwin Tulfo iyang gihinganlan og demonyo sila si Senador Risa Hontiveros ug Antonio Trillanes nga mga demonyo ug ang mga utok, utok sa ok-ok. Iya usab nga giingnan si Senador Kiko Pangilinan nga kun anaa pa kini sa iyang atubangan iya na unta kining gisagpa.

Karon human mapili nga enador sa Pilipinas, kuyog na si Senador Erwin Tulfo nila ni Senador Risa Hontiveros ug kanhi senador Antonio Trillanes nga iyang gitawag nga mga demonyo ug mga utok ok-ok. Amigo napod sila ni Senador Kiko Pangilinan nga iya untang sagpaon.

Ad hominem, mao ni ang iyang paghulagway sa dili direktang pagtawag ni Senador Rodante Marcoleta ngadto kang Senador Hontiveros nga walay background sa balaud. Nangugat ang senador sa iyang pagpanalipod kang Senador Risa Hontiveros nga iyang gitawag nga demonyo ug utok ok-ok.

Birds of the same feather flock together?

* * *

Ilisan ang lederato sa Senado nga ubos sa pagdumala ni Senate President Alan Peter Cayetano kana tungod kay wala kini direksiyon. Mao ni ang pahayag ni Senador Erwin Tulfo. Diha ka nasayop Mr. Senator. Naay direksiyon ang Senado karon, wala lang ka ug ang imong mga kauban sa minorya kay lahi man kini sa inyong direksiyon.

Ang direksiyon karon sa bag-ong mayorya sa Senado mao ang pagpadayon sa wala gipadayon nga imbestigasyon sa Blue Ribbon Committee nga gidumala ni Ping Lacson sa pinakadakong kawat sa salapi sa flood control project ingon man sa pag atiman sa tanang suliran sa katawhan sama sa presyo sa lana, trabaho, inflation ug uban pa.

Dili pariha sa inyong direksiyon sa minorya nga nakasentro lang sa pag impeach ni VP Sara ug sa pagseguro nga dili gayod mabulgar ang utok sa panapi sa flood control nga nagtungkawo sa Malakanyang.