Naputol nga kahawod

Ug napapas ang mayoriya si Senate President Alan Peter Cayetano. Giluwatan na sa Sandiganbayan 5th Division ang arrest warrant batok ni Senador Jinggoy Estrada sa iyang kasong plunder. Sa ato pa, dili na siya makatambong sa mga sesyon sa Senado.

Kay tabla na mang majority bloc (11) ug minority bloc (11), wala nay paglaom nga makalusot ang sugyot nga gipamugos nilang Cayetano ug Senador Rodante Marcoleta pagtugot sa remote voting para sa ilang kaubanan nga nagtago (Senador Bato dela Rosa) o mapriso (sama ni Jinggoy ug sa mga mosunod pa).

Natapos nang mga maniobra ni Cayetano:

Nga nagsugod sa pagkumbinser ni Dela Rosa paggawas sa gitagoan aron mahimong ika-13 nga boto sa kudeta sa Senado niadtong Mayo 11;

Nga gisundan sa pagtago ni Dela Rosa gikan sa arrest warrant sa International Criminal Court pinaagi sa Senate protective custody nga wala itugot sa balaod;

Nga niresulta sa pagpabuto sa mga guwardiya sa Senado niadtong gabii sa Mayo 13 aron sa pagpatuo nga gi-atake ang Senate building;

Nga gidudahang gitumong sa pagpa-ikyas ni dela Rosa sa kadlawon sa Mayo 14.

Ang pagpanlaktod sa remote voting amendment maoy nahimo nga kataposang kang-a nga nakapahagsa sa kahawod ni Cayetano:

Nakapamata nilang Senate Minority Leader Tito Sotto ug kaubanan nga kay wala na si Dela Rosa dili makaabot og quorum ang majority bloc (pag-absent ni Senador Chiz Escudero niadtong Martes nakatabang sa paglampos sa walk out sa minority bloc); ug

Nakahingpit sa kaluod sa pipila ka sakop sa majority bloc nga nipasumbingay nang mobalhin sa minoriya.

Bisan dili matinuod ang gipaabot nga pagbalhin sa labing menos duha ka sakop sa majority bloc, nga magpasabot nga magpabilin si Cayetano sa puwesto, makahimo siya og kasaysayan nga labing unang Senate president nga inutil:

Kay ang mas daghan nga minority bloc mao nay magbuot kinsa ang mangulo sa labing importanteng mga komitiba ug kon unsa nga mga balaudnon ang tukion ug aprobahan; ug

Bisan siyay presiding officer sa impeachment trial ni Bise Presidente Sara Duterte, ang mas daghang senator-judges sa minority bloc makapanalipod sa kaligdong ug kamakiangayon sa husay --pinaagi sa pagseguro nga mapresentar ang labing importanteng mga ebidensiya ug mga testimoniya.