PCL Cebu Basketball League, Gullas nangu sa 1st District ngadto sa kampiyonato

CEBU, Philippines — Ang 1st District nga gipangulohan ni Talisay City Mayor Gerald Anthony "Samsam" Gullas Jr. mipakgang sa upat ka tuig nga paghari sa 4th District uban ang 71-66 nga kadaogan aron sakmiton ang kampiyonato sa 2024 Philippine Councilors League (PCL) Cebu Provincial Federation Basketball League didto sa Mandaue City Sports and Cultural Complex ning bag-ohay pa lamang.

Maanindot kini nga pagtak-op sa ilang kampanya alang sa 1st District, nga miposte og perpektong 7-0 rekord sa pagsakmit nila sa korona ning tinuig nga torneyo nga nagmalampuson tungod sa hugtanong suporta ni PCL Cebu presidenta and Provincial Board Member Ricardo "Kuya Nick" Pepito sa Toledo City.

Si Gullas mipabuto og 21 puntos, 11 niini iyang gibubo sa unang kuwarter aron pagtuboy sa 1st District ngadto sa sayong 25-18 nga labaw. Sukad niadto, ang 1st District na maoy mikontrola sa duwa ug nakasugakod sa madasigon nga hagit sa 4th District dayon na sa pag-eskapo ngadto sa singko puntos nga kadaogan.

Si Gullas nakakuha og dakong suporta gikan ni Sibonga Vice Mayor Joel Ponce, nga milansang og tulo ka 3-pointers sa iyang 15 puntos, ug ni Carcar City Councilor Inting Escobido nga miamot og 12 puntos alang sa 1st District.

Ang ubang mga sakop sa 1st District champion team mao sila si Minglanilla Mayor Rajiv Enad, councilor Boyet Velez ug ABC President Dongly Traya, konsehales Gail Restauro, Rocky Bas ug Lester Daan ug SK Federation President Johnvan Restauro sa Talisay, Elmer John Lapitan ug Faith James Servano sa Naga City, Harold Nacua sa Carcar ug Ricci Reluya sa San Fernando.

Si Daanbantayan Mayor Sun Shimura mihipos og 17 puntos apan nakawang ang iyang paningkamot gumikan kay nalumpag  na gyud ang dominasyon sa 4th District.