Mga kawani sa Cebu City makadawat og P25,000 nga bonus
CEBU, Philippines — Nasugdan na sa Cebu City Treasurer’s Office ang pag-release sa gipaabot nga Christmas bonus alang sa mga kawani sa kagamhanan sa Dakbayan sa Sugbo kagahapon, Disyembre 11, 2024.
Nikabat ngadto sa P25,000 ang madawat sa matag kawani sa mga departamento nga nahuman na pagproseso sa ilang dokumento ug mahimo na kini nila nga makobra sa ilang ATM.
Ang makadawat sa maong kantidad mao ang mga coterminous, regular, ug casual nga mga kawani.
Sa niaging semana nihangyo si Mayor Raymond Alvin Garcia nga paspasan ang pagproseso sa Christmas bonus ug differential bonus alang sa buwan sa Agosto, Septiyembre, Oktubre ug Nobiyembre.
Nasayran nga ang differential mao kini ang pag-adjust sa sweldo sa tanang nagtrabaho sa gobiyerno subay sa mando ni Presidente Ferdinand Marcos, Jr. atol sa iyang State of the Nation Address (SONA) niadtong Hulyo niining tuiga.
Base sa report sa Cebu City Public Information Office nga ang mga nagtrabaho sa Cebu City Hall magsugod ang pag-adjust sa buwan sa Agosto.
Apan gumikan kay nadawat na sa mga kawani ang ilang sweldo sa maong mga buwan mohatag ang siyudad sa ligas sa sweldo matag buwan sugod sa Agosto.
Samtang makadawat usab og P5,000 nga bonus ang mga job order employees ug mga kawani sa mga barangay sa siyudad. (BANAT NEWS)
- Latest
