Pinas humingi raw muna permiso sa China sa resupply mission, sinopla ng PCG

MANILA, Philippines — Nais ng China na humi­ngi muna ng permiso ang Pilipinas bago magpadala ng supplies o magsagawa ng medical evacuations papunta at pabalik ng BRP Sierra Madre sa Ayungin Shoal.

Ginawa ni Chinese Fo­reign Ministry spokesperson Mao Ning ang pahayag bilang reaksyon sa tangkang panghaharang ng China Coast Guard (CCG) sa Philippine Coast Guard (PCG) habang ini-evacuate ang may sakit na sundalo patungo sa Palawan noong nakaraang buwan.

Iginiit ni Mao na kung nagpaalam muna, hindi hahadlangan ng mga opisyal ng Beijing ang pag-access ng mga Pilipino sa Ayungin Shoal.

“China’s position on the issue of Ren’ai Jiao  (Ayungin Shoal) is clear..If the Philippines notifies the Chinese side in advance, we can allow delivery of living necessities to the grounded warship or evacuation of personnel concerned,” ayon kay Mao.

Una nang kinondena ni Philippine Coast Guard spokesperson Commodore Jay Tarriela ang “barbaric” at “inhumane” na aksyon ng China Coast Guard nang sadyang harangin at banggain ang sinasakyang infkatable boat ng sundalong Pilipino na dadalhin sa Buliluyan Port.

Inagaw din ng China ang isa sa apat na supply packages na ini-airdropped ng Armed Forces of the Philippines (AFP) sa BRP Sierra Madre, na barko ng Philippine Navy sa West Philippine Sea (WPS).

Gayunman, nilinaw pa ni Mao na hindi naman maaring gamitin ng Pilipinas ang paghingi ng permiso kung ang idedeliber ay construction materials at pagtatangkang permanenteng okupahin ang Ayungin o Ren’ai Jiao’.

Umalma naman ang PCG sa pahayag ng China, sa pagsasabing walang dahilan para hu­mingi pa ng permiso ang anumang nais gawin ng gobyerno ng Pilipinas sa West Philippine Sea.

“The Philippine govern­ment is under no obligation to seek permission from a country that has illegally and provocatively deployed their forces within our exclusive economic zone,” sabi ni Tarriela.

Dapat anyang isipin ng China na ang Ayungin Shoal ay nasa 105 nautical miles o 194 kilometro mula sa coastline ng Palawan, at nasa loob ng 200-nautical mile Exclusive Economic Zone ng Pilipinas, kaya walang hurisdiksyon ang China sa katubigang nabanggit.