Sinabi ng Pangulo na naihain na ang panukalang batas na isusulong ni Senador Rene Cayetano patungkol sa PPA, pero nilinaw na ang nais ng Malacañang ay maibaba ito at hindi maibasura na matagal nang inirereklamo ng mga consumers. "Hindi naman natin pinag-uusapan na aalisin ang PPA ang pinag-uusapan natin ay ibaba," paliwanag ng Pangulo.
Kahapon ay isinampa ni Sen. Cayetano ang Senate Bill No.2109 na humihiling na suspindihin ang PPA sa loob ng anim na buwan, mula Hulyo 2002 hanggang Enero 2003, o hanggang sa magkaroon na ng desisyon ang Energy Regulatory Commission tungkol sa kung magkano talaga ang universal charge ng Napocor.
Sinabi pa ni Cayetano, chairman ng Senate committee on energy na sa kanyang panukala ay ipupuwera sa PPA ang mga consumers na gumagamit ng kuryente na hindi hihigit sa 75 kilowatthour sa bawat buwan. Babawasan din ng 85 sentimos ang kasalukuyang P1.25 per kilowatthour at gagawing 40 centavos na lamang.
Inaasahan ni Cayetano na maisasabatas ang kanyang bill bago mag-recess ang Kongreso sa Hunyo 7. (Ulat nina Ely Saludar/Rudy Andal)