Official candidates sa Miss Badian 2025 ug Hari ng Badian 2025 gipaila na!

Pormal na nga gipaila sa niaging adlaw ang 16 ka mga opisyal nga kandidata sa Miss Badian 2025 human sa lapad nga screening.

Atol sa paglusad sa maong indigay, gipaila usab ang 14 ka mga ambongan nga lalaki nga magtigi sa Hari ng Badian 2025.

Sa gihimong press conference, gibutyag sa pageant organizer nga si Mhike Jelord Rollo nga gibuksan nila sa laing mga lugar ang magtigi sa nahisgotan nga mga indigay.

“Gibuksan namo kini nga kompetisyon kay gusto namo nga makahatag og higayon sa nagkalain-laing matang sa tawo nga gikan sa nagkalain-laing lugar nga maka-promote sa turismo ug kultura sa Badian — dili lang mga taga-Badian, apan kadtong adunay dako nga impluwensya,” saysay pa ni Rollo. Dugang pa niya nga dili gyud ikalimod nga adunay mga inbidwal nga adunay impluwensya nga makatabang sa pagpalambo ug pagpalapad sa turismo ug kultura sa lungsod.

“Gusto nato nga maapil ang atong mga kasikbit nga lungsod, syudad, ug probinsya aron mas mailhan pa gayud ang Badian ug ilang madala ang ilang mga kasinatian gikan sa ilang pag-apil dinhi sa Badian balik sa ilang tagsa-tagsa ka komunidad ug mosulti pa og labaw pa kabahin sa lungsod,” matud pa ni Rollo.

Suma pa sa ni Badian Mayor-elect Jerome Librando nga ang Miss Badian 2025 ug Hari ng Badian 2025 kay nagtumong sa pagpili sa mga batan-ong babaye ug lalaki nga mahimong representante sa kasingkasing sa kabilin sa Badian, nga motabang sa pagpreserba sa kultura ug madasigon nga imahe sa mga nagpuyo sa maong dapit.

Samtang ang tourism officer sa Badian nga si Earl Endab nibutyag nga angayan gyud atngan ang koronasyon sa Miss Badian ug Hari ng Badian 2025 gumikan sa dili basta-basta nga presentasyon niini .

Nagtangag og P100K nga premyo alang sa makakulit sa titulo nga Miss Badian 2025.

Mahitabo ang “Miss Badian 2025 karong July 20, samtang ang Hari ng Badian 2025 kay pagahimoon karong July 22.

Ang mga kandidata sa Miss Badian 2025 kay naglangkob nila ni Abby Perez Cañete, Angel Grace Fuentes Mangaron, Sheree Mare Danday, Jojo McLean, Mariah Marah Pasaol, Rachelle Anne Tingal, Erica Jean Cadayday, Althea Mae Uy, Caitlin Martinez, Alyssa Bella Suarez, Maria Fey Navasquez, Desiree Jabonero, Charry Layese, Lea Coronado, Johanna Francisco ug Qatari Semblante.

Samtang ang magtigi sa Hari ng Badian 2025 kay sila si Matthew Bardilas, Aldritch Amabao, Herol James Liston, Stephan Lee, Jaime Enriquez Salomon, Lance Daniel Cruz, Mamerto Lemente, Daniel Tangalin, Ren Fortich, Gabriel Exequiel Cabalhin, Miguel Brigoli, JM Jagdon, Jericho Vinz Pedrano, Chun Yu Lim ug Wilhelm Josh Go.